პოლიტიკური პლატფორმა “სტრატეგია აღმაშენებლის” თავმჯდომარე ეხმიანება მთავრობის გადაწყვეტილებას ფრენების აღდგენისა და რეგულაციების შემსუბუქების თაობაზე. ამასთან, ოპოზიციონერი ლიდერი აღნიშნავს, რომ სასურველია კონკრეტული გადაწყვეტილებები დროულად მიიღებოდეს და უკეთესი იქნება თუ პარტიის სხვა რეკომენდაციებსაც გაითვალისწინებენ:
“როგორც იქნა, საქართველოს მთავრობა გონს მოეგო. 1-ლი თებერვლიდან რეგულარული ფრენების აღდგენასთან ერთად, საქართველოს მოქალაქეებისთვის შემოსვლის წესის შემსუბუქება მოხდება. მნიშვნელოვანია, რომ ამ მიმართულებით მთავრობამ დაგვიანებით, თუმცა მაინც გადადგა კონკრეტული ნაბიჯები.
უკეთესი იქნება თუ ჩვენს სხვა რეკომენდაციებსაც გაითვალისწინებენ, რითაც ნაკლები ზიანი მიადგება ჩვენს ქვეყანას და მოქალაქეებს.
ჯერ კიდევ გასული წლის აპრილში ვსაუბრობდი, რომ მთავრობის მიერ არაპროპორციული, ქვეყნისთვის საზიანო შეზღუდვები ეკონომიკის მინიმუმ 6%-მდე ვარდნას გამოიწვევდა, რაც ახლა ოფიციალურად მთავრობამაც დაადასტურა.
მათი გადადგმული ნაბიჯები დიდწილად ემსახურებოდა საარჩევნო და პოლიტიკურ მიზნებს.
საზღვრის გადმოკვეთისას PCR-ტესტირების მექანიზმი, რომელიც მთავრობამ წარადგინა, ჩვენ ჯერ კიდევ 2020 წლის მაისის თვეში შევთავაზეთ. სამწუხაროა, რომ საქართველოს მთავრობა დაგვიანებით ახდენს პრობლემებზე რეაგირებას, ისიც, მას შემდეგ, რაც ქვეყანა და ჩვენი მოქალაქეები სერიოზულ ზიანს იღებენ,” – განაცხადა გიორგი ვაშაძემ.