მომდევნო კვირის განმავლობაში ინფიცირების მატება გვექნება იმის ხარჯზე, რომ მეტი შემთხვევის გამოვლინება გვექნება – თამარ გაბუნია

ჯანდაცვის მინისტრის მოადგილე განმარტავს, რომ ინფიცირების შემცირებული რაოდენობა ტესტირების შემცირების გამოა და იგი შეიძლება გაიზარდოს ტესტირებების რაოდენობის გაზრდის შემთხვევაში:

“ბოლო ორი დღის განმავლობაში, ჩვენ შემთხვევების დაბალი მაჩვენებელი გვაქვს არა ჭეშმარიტი კლების საფუძველზე, არამედ იმის გამო, რომ საახალწლო პერიოდში რეალურად ძალიან ცოტა ადამიანი მივიდოდა ტესტირებისთვის.

ვფიქრობ, რომ ჩვენ მომდევნო კვირის განმავლობაში მატება გვექნება არა იმის ხარჯზე, რომ რეალური მატებაა, არამედ იმის ხარჯზე, რომ მეტი შემთხვევის გამოვლინება გვექნება.

დადებითობის მაჩვენებელი ტესტირების შედეგად კვლავაც რჩება 11%-ის ფარგლებში. ჩვენი მიზანი არის, რომ ეს მაჩვენებელი 5%-მდე შემცირდეს და უფრო ქვემოთ ჩამოვიდეს, მხოლოდ ამის შემდეგ გვექნება საფუძველი, რომ რეალურად ინფექციის საზოგადოებაში გავრცელება იკლებს და იმის შანსი, რომ შეზღუდვების შემსუბუქების შემდეგ ისევ თავიდან მივიღებთ ახალ პიკს, რა თქმა უნდა იქნება ნაკლები,” – აცხადებს თამარ გაბუნია.

შეგახსენებთ, რომ დღეს დილის მონაცემებით, 24 საათის განმავლობაში, ქვეყანაში კორონავირუსით ინფიცირების 417 ახალი შემთხვევა დაფიქსირდა, გამოჯანმრთელდა 2 469 პაციენტი, ხოლო გარდაიცვალა – 31 ადამიანი.