ელენე ნიჟარაძე, სამართლიანი არჩევნებისა და დემოკრატიის საერთაშორისო საზოგადოების (ISFED) გამგეობის გადაწყვეტილებით, ორგანიზაციის დირექტორის თანამდებობას დატოვებს. აღნიშნულთან დაკავშირებით, ორგანიზაციაში დღეს ბრიფინგი გაიმართა, სადაც გამგეობის წარმომადგენლებმა თამარა სართანიამ და ბაია პატარაიამ განმარტებები გააკეთეს და საპარლამენტო არჩევნების დროს “სამართლიანი არჩევნების” მიერ ჩატარებული პარალელური დათვლისას მიღებულ შედეგებში დაშვებული შეცდომის მოკვლევის ანგარიში წარადგინეს:
„ჩატარებული გასაუბრებების და დოკუმენტების შესწავლის საფუძველზე, კომისიას მიაჩნია, რომ ხმების დათვლის ფორმულაში აღმოჩენილი ხარვეზი არის ადამიანური შეცდომა, რომლის თავიდან აცილებაზე პასუხისმგებლობა თანაბრად ეკუთვნის ISFED-ის PVT კოორდინატორს/დირექტორის მოადგილეს და NDI ვაშინგტონის ოფისის ექსპერტებს.
კომისიას მიაჩნია, რომ აღმასრულებელმა დირექტორმა ვერ გაითვალისწინა არსებული პოლიტიკური კონტექსტი და საარჩევნო სუბიექტების მიერ მიღებული ხმების დათვლის ფორმულაში აღმოჩენილი ხარვეზის შესახებ დროულად არ მიაწოდა ინფორმაცია საზოგადოებას, რითიც რისკის ქვეშ დააყენა ორგანიზაციის რეპუტაცია და, ზოგადად, PVT-ის მეთოდოლოგიის სანდოობა. ამასთანავე, კომისიის მიერ მოკვლეული ინფორმაციით, არ იკვეთება აღმასრულებელ დირექტორზე ზეწოლის ან დაშინების მცდელობა, რაც მას ამ ინფორმაციის დამალვას აიძულებდა“.
ბრიფინგზე, ორგანიზაციის ყოფილმა დირექტორმა, ელენე ნიჟარაძემაც ისაუბრა და აღნიშნა რომ მისთვის თანამდებობის დატოვება პრობლემას არ წარმოადგენს თუ კი ამით ორგანიზაციის რეპუტაციას დაიცავს:
„რაც შეეხება ჩემ გადადგომის საკითხს, მე მიმაჩნია რომ, რადგან ამან ასეთი აზრთა სხვადასხვაობა გამოიწვია, რაც მოსალოდნელი იყო და ამისთვის მზად ვიყავით რომ როდესაც საზოგადოებაში ინფორმაციის კომუნიკაცია მოხდებოდა ეს გამოიწვევდა მღელვარებას და გააჩენდა კითხვებს. ეს იყო პირველი შემთხვევა,როდესაც ასეთი რაღაც იქნა დაშვებული PVT-ის შედეგებში და ჩვენ ძალიან დიდ ყურადღებას ვაქცევთ იმას, რომ მაქსიმალურად უშეცდომოდ იყოს გაკეთებული ყველაფერი, რაც ძალიან მაღალი სტანდარტია ორგანიზაციისთვის. ჩვენთვის, ასევე ძალიან მაღალი სტანდარტია გამჭირვალობა და მივიჩნიეთ, რომ რაც არ უნდა მცირედი ხარვეზი ყოფილიყო, ამის შესახებ საზოგადოებას უნდა სცოდნოდა, მაგრამ, რადგან გამოიწვია ამან ასეთი აზრთა სხვადასხვაობა, შეიქმნა აჟიოტაჟი და გაჩნდა კითხვები ორგანიზაციის რეპუტაციის მიმართ, მე ჩავთვალე, რომ ჩემთვის მთავარია ორგანიზაციის რეპუტაცია. ამ ორგანიზაციაში 9 წელი ვმუშაობდი, ჩემთვის პრობლემა არ იყო თანამდებობის დატოვება, თუ ეს რაღაცნაირად დაიცავს ორგანიზაციის რეპუტაციას”, – აცხადებს “სამართლიანი არჩევნების” ყოფილი დირექტორი, ელენე ნიჟარაძე.
ავტორი
ნინი შავლაძე
