ხელისუფლებასა და ოპოზიციას შორის მოლაპარაკებების მესამე რაუნდი გაიმართა, თუმცა უცნობია რა გადაწყვეტილებები მიიღეს პოლიტიკოსებმა და რა არის მათი შეთანხმება. რამდენიმე საათიანი მოლაპარაკებების შემდეგ, ორივე მხრიდან გაკეთდა კომენტარები, მაგრამ დეტალებზე არცერთ მათგანს უსაუბრია. აღნიშნულ საკითხთან დაკავშირებით, საკუთარ ფეისბუქ გვერდზე პოსტს აქვეყნებს „მთავარი არხის“ გენერალური დირექტორი, ნიკა გვარამია და მიმართავს ოპოზიციას, რომ გაასაჯაროვონ მოლაპარაკებების პროცესი:
„ღიად და პირდაპირ მივმართავ ოპოზიციას:
რას ნიშნავს დაუსრულებელი არგასაჯაროება და დამალვა, რაზე მიდის მოლაპარაკებები?
რატომ გვამკითხავებთ, ვინ შედის, ვინ არა, ვინ რაზე თანახმაა, ვინ რისი წინააღმდეგია?
თუ თქვენ ვერ ხვდებით, მე გეტყვით: ახლა მიმდინარეობს ოპოზიციის ოცნებიზაცია – ჯერ იმათმა მოგვპარეს ხელისუფლება და ახლა ზუსტად იგივეს აკეთებთ თქვენ – გვპარავთ სიმართლეს და მასთან ერთად ხელისუფლებას, ხალხისგან ფარულად თანხმდებით ჯერ ერთმანეთთან და მერე – “ქართულ ოცნებასთან”.
გახსოვდეთ, ხელისუფლება წაგვართვეს ჩვენ – ხალხს, და არა თქვენ – ოპოზიციურ პარტიებს. თქვენ წარმოადგენთ ხალხს და არა საკუთარ თავს და საკუთარ ინტერესებს. კეთილი ინებეთ და ჩვენც გაგვაგებინეთ რაზე მიდის შეთანხმება/მოლაპარაკებები.
მთავარი არხის სახელით მოვითხოვ (იმედია, სხვა მედია საშუალებებიც შემოგვიერთდებიან),
გასაჯაროვდეს, რაზე მიდის მოლაპარაკებები და რატომ დაემსგავსა ეს ყველაფერი ვაჭრობას;
დაიშვას მედია ოპოზიციის საერთო შეკრებებზე და მოხდეს პირდაპირი ტრანსლირება, რათა გაირკვეს, ვინ შედის, ვინ რაზეა თანახმა, ვინ უგორებს კოჭს ივანიშვილს და ვინ იცავს ხალხის პოზიციას“, – წერს ნიკა გვარამია სოციალურ ქსელში.
ავტორი
ნინი შავლაძე
