“განმეორებით არჩევნებს “ქართული ოცნება” არ განიხილავს და რა თქმა უნდა, ჩვენ ამაზე შეთანხმებას არ ვგეგმავთ” – არჩილ თალაკვაძე

პარლამენტის თავმჯდომარე არჩილ თალაკვაძე ხელისუფლებასა და ოპოზიციას შორის გამართული მოლაპარაკებების შეფასებისას იმედს გამოთქვამს, რომ შემდგომ შეხვედრაზე მოხდება შეთანხმების მიღწევა და შესაძლებელი გახდება პარლამენტის მრავალპარტიული ფუნქციონირების დაწყება:

“დღევანდელი შეხვედრა არის შეთანხმებისკენ კიდევ ერთი წინგადადგმული ნაბიჯი. ნამდვილად ეს ემსახურებოდა პოზიციების კიდევ უფრო დაახლოებას, იმ მნიშვნელოვან საკითხებზე, რაც უკავშირდება პოლიტიკური სისტემის სტაბილურობას, ოპოზიციასა და უმრავლესობას შორის შემდგომ გრძელვადიან თანამშრომლობას, რაც დღეს ჩვენს ქვეყანას ძალიან სჭირდება.

მინდა იმედი გამოვთქვა, რომ შემდეგ შეხვედრაზე ჩვენ მივაღწევთ პოზიციების უკვე ისე შეთანხმებას, რომ  შესაძლებელი გახდება მისი გაფორმება და პარლამენტის მრავალპარტიული ფუნქციონირება.

განმეორებით არჩევნებს “ქართული ოცნება” არ განიხილავს და რა თქმა უნდა, ჩვენ ამაზე შეთანხმებას არ ვგეგმავთ,” – აცხადებს არჩილ თალაკვაძე.