არჩევნებთან და გაკეთებული არჩევანის დაცვასთან დაკავშირებით პოზიციას აფიქსირებს “ერთიანი ნაციონალური მოძრაობის” პოლიტსაბჭოს თავმჯდომარე ნიკა მელია სოციალურ ქსელში გამოქვეყნებულ პოსტში და აცხადებს, რომ ხმის ქურდებსაც და მათ „ქურდულ“ „შაიკასაც“ – აუცილებლად მოუწევთ პასუხისგება იმაზე რაც ჩაიდინეს:
“არჩევანს მარტო არჩევნების დღეს არ აკეთებ ადამიანი.
არჩევანს აკეთებ შემდეგაც – ან იბრძვი შენს მიერ გაკეთებული არჩევანის დასაცავად, რომელიც მოგპარეს, ან ეგუები მის ასე უტიფრად და უსინდისოდ მოპარვას და ამ შეგუებით დანაშაულის თანამონაწილე ხდები.
დღეიდან, მე ვებრძვი როგორც ხმის ქურდებს, ისე, მათთან ბინძურ გარიგებაში მყოფ ე.წ. „ქურდებს“. სწორედ მათ და სხვამ არავინ გადაწვეს ჩემი შტაბი.
რა ფოკუსებიც არ უნდა ატაროს ყალბისმქმნელმა რეჟიმმა, ყველამ იცის და მათაც – კალაძე&კობიაშვილმა და მათმა „შნირებმაც“ – ე. წ. კანონიერმა ქურდმა ნოდარ შუკაკიძემ, იგივე ნოდო გლდანსკიმ, რომელიც საბერძნეთში იხდის სასჯელს და მისმა აქ მყოფმა ოცნების პარტიულმა კორდინატორმა ძმამაც კარგად იციან, რა მწარედაც წააგეს ბრძოლა გლდანში და ეს გადაწვა სხვა არაფერი იყო თუ არა მარცხისგან ისტერიკაში ჩავარდნილი ბოღმის ამოფრქვა – პირდაპირი მნიშვნელობით ცეცხლად ამოფრქვევა.
ხმის ქურდებსაც და მათ „ქურდულ“ „შაიკასაც“ – აუცილებლად მოუწევთ პასუხისგება იმაზე რაც ჩაიდინეს.
ვერსად დაიმალებიან, თუ რა თქმა უნდა, მიწა პირს არ იზამს და თან არ ჩაიტანს.
ამ ქვეყანას არავის გავათელინებთ…“, – წერს ფეისბუქის პირად გვერდზე ნიკა მელია.