„ქართული ოცნების“ გენერალურმა მდივანმა, კახა კალაძემ ოპოზიციის მიმდინარე აქციის პარალელურად მმართველი პარტიის სახელით განცხადება გააკეთა და თქვა, რომ ოპოზიციამ არჩევნების შედეგების გადამოწმების ორივე საშუალებაზე უარი განაცხადა:
“გვინდა საზოგადოება მიმდინარე მოლაპარაკებებზე საქმის კურსში ჩავაყენოთ. “ქართული ოცნება” არ განიხილავს ქართველი ხალხის მიერ თავისუფალ არჩევნებში გამოხატული ნების კითხვის ნიშნის ქვეშ დაყენებას – ხელახალ არჩევნებს ან მსგავს საკითხებს. არავის დაავიწყდეს, რომ ჩვენ პატივი უნდა ვცეთ ხალხის არჩევანს, რომელიც გამოიხატა ოპოზიციური პარტიებისა და „ქართული ოცნების“ მხარდაჭერით.
პანდემიის ამ უმძიმეს პირობებში პარტიების ნება 2 მილიონამდე ამომრჩეველმა გამოხატა, სადაც მილიონამდე ამომრჩეველმა, მხარი სწორედ “ქართულ ოცნებას” დაუჭირა. ამისათვის მადლობა ჩვენს ამომრჩეველს და რომლებსაც მივმართავ, არავინ აპირებს ისე წარმართოს პოლიტიკური დიალოგი, რომ თქვენი ხმები და მხარდაჭერა ვინმემ გაბედოს და მეორეხარისხოვნად მიიჩნიოს.
რაც შეეხება დეტალებს დიალოგზე შეთანხმებული წესების მიხედვით, მოლაპარაკების საკითხები საჯაროდ, ამ ეტაპზე არ უნდა გახმოვანებულიყო. ამის მიუხედავად, ოპოზიცია საჯაროდ საუბრობენ იმაზე, რომ ისინი ხმების გადათვლაზე არ თანხმდებიან. ამიტომ, ინფორმაცია ცალმხრივი რომ არ იყოს, ჩვენც ვადასტურებთ, რომ მათ უარი თქვეს შედეგების გადამოწმების ორივე ფორმაზე: ბიულეტენების გადათვლასა და ვიდეო-ჩანაწერების ნახვაზე, რომელიც გამორიცხავდა სპეკულაციებს ე.წ. კარუსელებზე. როგორც ჩანს, მათი ინტერესი არ არის სიმართლე გაირკვეს და ურჩევნიათ მოდელირებული, გამოგონილი გაყალბებული არჩევნებით ივაჭრონ.
მიუხედავად ამისა ვიტოვებთ იმედს, რომ მათი უსაფუძვლო პოზიცია შეიცვლება და დიალოგი ქვეყნისათვის პოზიტიური შედეგებით დასრულდება“, – განაცხდა კახა კალაძემ.
ავტორი
ნუცა ჯოხაძე
