გავრცელებული ინფორმაციით “ნაციონალური მოძრაობის” თავმჯდომარემ, გრიგოლ ვაშაძემ გააკეთა მიმართვა, რომელშიც ოპოზიციურ პარტიებს ხელისუფლებასთან მოლაპარაკების მაგიდასთან დაჯდომისკენ მოუწოდებს, რათა დასრულდეს პოლიტიკური კრიზისი.
აღნიშნულ მიმართვას გამოეხმაურნენ როგორც „ნაციონალური მოძრაობის“, ასევე სხვა ოპოზიციური პარტიის ლიდერები.
სოციალურ ქსელში განცხადებას ენმ-ს პოლიტსაბჭოს წევრი ხატია დეკანოიძე გამოეხმაურა:
„გრიგოლ ვაშაძის განცხადება არ იყო პარტიის ლიდერებთან და პოლიტსაბჭოსთან შეთანხმებული პოზიცია.
სამწუხაროა, რომ პარტიის თავჯდომარე განხილვის გარეშე მსგავს განცხადებას აკეთებს…
ჩვენ მოლაპარაკების წინააღმდეგი არ ვართ, მხოლოდ პირობებით, რომელიც არის გაზიარებული სრულიად ოპოზიციური სპექტრის მიერ.
ოფიციალური პარტიის განცხადება გაკეთდება ცალკე…“ – წერს ხატია დეკანოიძე ფეისბუქის პირად გვერდზე.
პარტიის თავმჯდომარის მიმართვასთან დაკავშირებით სოციალურ ქსელში განცხადება ჟურნალისტმა და ენმ-ის მაჟორიტარობის კანდიდატმა, ნანუკა ჟორჟოლიანმაც გააკეთა.
„რა ძალზედ სახიფათო? ახლა გაიგეთ რომ კორონაა? ანუ, ბიძინას შედეგები სწორია? თუ არსებობენ ადამიანები, რომელთა მოტივაციაც მხოლოდ თბილი სავარძელია?! თურმე არიან! თუ ეს განცხადება მართალი აღმოჩნდება და ეს ადამიანი პარტიის თავმჯდომარედ დარჩება, მიმიფურთხებია ამ პარტიისთვის!“, – განაცხადა ნანუკა ჟორჟოლიანმა.
ასევე გავრცელდა „ერთიანი საქართველო-დემოკრატიული მოძრაობის“ ლიდერის ნინო ბურჯანაძის განცხადება. მისი აზრით, გრიგოლ ვაშაძე ოპოზიციურ ერთობას არავითარ შემთხვევაში არ უღალატებს. ოპოზიციონერი ლიდერი საერთაშორისო კომპონენტის ჩართვასა და მოლაპარაკების მაგიდასთან დასხდომის აზრს არ ეწინააღმდეგება.
„სტრატეგია აღმაშენებელის“ ერთ-ერთი ლიდერი თაკო ჩარკვიანი მედიასთან ინტერვიუში ამბობს, რომ ის გრიგოლ ვაშაძის აღნიშნულ განცხადებას ერთმნიშვნელოვნად არ ეთანხმება და წინააღმდეგია, რომ ხელისუფლებას არასამართლებრივ მოქმედებებში შეყვეს.
იმის გათვალისწინებით, რომ დაფიქსირებულმა პოზიციამ, აზრთა სხვადასხვაობა გამოიწვის, გრიგოლ ვაშაძემ რამდენიმე საათის წინ სოციალურ ქსელში გაავრცელა განმარტებები.
“დამატებით განვმარტავ:
- მოქალაქეთა პროტესტი უნდა გაგრძელდეს;
- ამ პროტესტს სასწრაფოდ უნდა დაემატოს პოლიტიკური კომპონენტი – სამართლიანი არჩევნების პრინციპების განხორციელების თაობაზე მოლაპარაკებების სახით სტრატეგიული მოკავშირეების მედიაციით;
- სანამ/თუ მოლაპარაკებები წარმატებით არ დასრულდება არც მეორე ტურში მონაწილეობას არ ვღებულობთ და არც პარლამენტში არ შევდივართ;
4. ერთხელ და სამუდამოდ ყველა უნდა დავიძაბოთ, რომ მომავალში ქუჩის პროტესტმა ნორმალური პროცესი არ ჩაანაცვლოს არჩევნების გაყალბების გამო,” – წერს გრიგოლ ვაშაძე.
ავტორი
ნუცა ჯოხაძე
