“არჩევნები საქართველოში ჩატარდება კონსტიტუციურ ვადებში…’’ – გიორგი გახარია

საქართველოს პრემიერმა, გიორგი გახარიამ მთავრობის ადმინისტრაციაში გამართულ ბრიფინგზე ქვეყანაში მიმდინარე სხვა საკითხებთან ერთად აღნიშნა, რომ არჩევნები კონსტიტუციურ ვადებში, ეპიდემიოლოგიური უსაფრთხოების გათვალისწინებით ჩატარდება:

“არჩევნები საქართველოში ჩატარდება კონსტიტუციურ ვადებში და არ გადაიდება რამდენიმე მიზეზის გამო: პირველი, – ყველას კარგად უნდა გვესმოდეს, რომ საარჩევნო უბანი ისეთ დონეზე იქნება მომზადებული ეპიდემიოლოგიური უსაფრთხოების თვალსაზრისით, რომ ხშირ შემთხვევაში, ზოგიერთ სავაჭრო ცენტრში და მაღაზიაში შესვლა იქნება ბევრად უფრო სახიფათო, ვიდრე საარჩევნო უბანზე მისვლა, სრული წესების დაცვით, ამიტომ, არანაირი  ეპიდემიოლოგიური რისკი არ იარსებებს.

ჩვენ, ყველა ვხედავთ, რომ პოლიტიკური საარჩევნო კამპანია მიმდინარეობს აბსოლუტურად ღიად. ერთადერთი, რასაც ჩვენ ვთხოვთ პოლიტიკოსებს, მოქალაქეებთან ერთად, წესების დაცვაა, ვატაროთ პირბადე და დავიცვათ დისტანცია. ყველას კარგად უნდა გვესმოდეს, რომ პოლიტიკურ პროცესს და არჩევნების დღეს არაფერი არ ემუქრება და ვერც დაემუქრება. ყველა მოვემზადოთ 31 ოქტომბრისთვის და ღირსეულად, დემოკრატიულად და რაც მთავარია უსაფრთხოდ უნდა ჩავატაროთ ეს არჩევნები’’ – განაცხადა გიორგი გახარიამ ბრიფინგზე.

ავტორი
ანა რობაქიძე