„სტრატეგია აღმაშენებლის“ ერთ-ერთმა ლიდერმა, სერგო ჩიხლაძემ, კოვიდპროცესების მართვის ჩავარდნის თაობაზე ისაუბრა საგანგებოდ გამართულ ბრიფინგზე და ჯანდაცვის მინისტრი ეკატერინე ტიკარაძე საჯაროდ დისკუსიაში გამოიწვია:
„ყოველდღე უარესდება ეპიდსიტუაცია და მისი მართვა საქართველოში, სრულიად მორღვეულია ტესტირება-დიაგნოსტიკის კომპონენტი, 112-ის და სასწრაფო დახმარების მიღების კომპონენტი, ასევე კოვიდ-სასტუმროებში პაციენტების მართვა, არაერთი ადამიანი გვეღუპება სამედიცინო დახმარების გარეშე ასეთ სივრცეებში. არ ვიცით სად დაიხარჯა პანდემიაზე მობილიზებული თანხები, საერთოდ დაფარულია ეს პროცესი და არ ვიცით ზოგადად რა გეგმა აქვს მთავრობას არსებული პროცესების სამართავად. აბსოლუტურად აცდენილია ოფიციალური პირების განცხადებები საწოლფონდთან დაკავშირებით, სახარჯ მასალებთან დაკავშირებით და არ არის ცნობილი რა მარაგები გვაქვს სამედიცინო მასალების, წამლების და ტესტების.
არ იწვევს ნდობას ის რიცხვები, რასაც აქვეყნებენ ტესტირებასთან დაკავშირებით, ახალ შემთხვევებთან დაკავშირებით. აქედან გამომდინარე, დრო აღარ ითმენს, ყოველი დაგვიანებული დღე ასეთი უმოქმედობისას, იწვევს დამატებით სიკვდილიანობას და ათასობით ადამიანის დაინფიცირებას. მივმართავ ქალბატონ ტიკარაძეს, ჯანდაცვის მინისტრს, ვიწვევ საჯარო დისკუსიაში კონკრეტულ თემებზე სასაუბროდ და მაქვს კონკრეტული შვიდი კითხვა:
- რა გააკეთეთ განვლილ 6 თვეში ჯანდაცვის სისტემის ეპიდემიის ტალღისთვის მოსამზადებლად და სად დაიხარჯა კოვიდზე მობილიზებული თანხები?
- რატომ გვეღუპება ადამიანები ე.წ. კოვიდ-სასტუმროებში?
- რატომ ვერ ააწყვეთ ტესტირება-დიაგნოსტიკის კომპონენტი ქვეყანაში გასული 6 თვის მანძილზე?
- რატომ არ მუშაობს 112 და სასწრაფო სამედიცინო დახმარების კომპონენტი ქვეყანაში?
- რატომ არ დაიწყეთ, ჯერ კიდევ გაზაფხულზე ოჯახის ექიმების მასიური ტრენინგი და მომზადება პაციენტების ბინაზე სამართავად?
- რატომ არ დაიწყეთ მოლაპარაკება კერძო სექტორთან საჭირო საწოლფონდისა და სამედიცნო პერსონალის მობილიზაციისთვის და მოსამზადებლად?
- რა გეგმა გაქვთ ეპიდემიის სამართავად?
ნუ გაექცევით პასუხისმგებლობას, ამ შეკითხვების უკან თითოეული ადამიანის სიცოცხლეა, ჩვენი ჯანმრთელობაა, ჩვენი ოჯახების, მოხუცების, ახალგაზრდების და ის უპასუხისმგებლობა, რასაც თქვენ, თქვენი უწყება და ზოგადად მთავრობა იჩენს, ჩვენ გვიჯდება სიცოცხლეების ფასად.
არაფერს ვამბობ იმაზე, რომ ეკონომიკურად ღატაკდება ქვეყანა და შიმშილისთვის არის განწირული კიდევ მრავალი ათასი ადამიანი, დამატებით ის ასიათასობით ადამიანი, რომელიც თქვენ შიმშილის ზღვარზე მიიყვანეთ გასული 6 თვის განმავლობაში. კიდევ ერთელ მოგიწოდებთ საჯარო დისკუსიაზე, გნებავთ დებატზე, ვისაუბროთ ამ საკითხზე და კონკრეტულ გეგმებზე.
არც ერთი ჩვენი გეგმა, რომელიც „სტრატეგია აღმაშენებელმა“ წარმოადგინა არ გაგიზიარებიათ და არ წაგიკითხავთ, იქნებ მივიდეთ რაღაც გადაწყვეტილებამდე და დაგარწმუნოთ, რომ სწორი ნაბიჯები გადადგათ“, – განაცხადა სერგო ჩიხლაძემ.
ავტორი
ემილი ფეიქრიშვილი
