მთავრობის ადმინისტრაციაში გამართულ ბრიფინგზე, დაავადებათა კონტროლის და საზოგადოებრივი ჯანმრთელობის ეროვნული ცენტრის ხელმძღვანელმა, ამირან გამყრელიძემ განმარტებები გააკეთა ქვეყანაში არსებულ ეპიდემიოლოგიურ მდგომარეობასთან დაკავშირებით და აღნიშნა, რომ ქვეყნის ფარგლებში არსებული შეზღუდვების მოხსნა ჯერ-ჯერობით არ იგეგმება:
„გლობალური სიტუაცია კვლავ უცვლელი რჩება, პანდემია გრძელდება საკმაოდ მაღალი ინტენსივობით, მიუხედავად იმისა, რომ შაბათ-კვირას ახალ შემთხვევათა რიცხვმა ზოგადად დაიკლო მთლიანად მსოფლიოში და დღეს არის 278 ათასი.
წინა კვირაში გვქონდა გარკვეული პიკური მაჩვენებელი, 350 ათასს გასცდა შემთხვევათა რაოდენობა. 5 ქვეყანაში განსაკუთრებით მზარდია ახალ შემთხვევათა რიცხვი, – მაგალითად ინდოეთმა 7 მილიონიან ზღვარს გადააბიჯა. ასევე მნიშვნელოვნად დაძაბულია სიტუაცია ევროპის ქვეყნებში, დასავლეთ ევროპის ქვეყნებში ზრდა აღინიშნება, განსაკუთრებით ჩეხეთში, ესპანეთში, საფრანგეთში, ასევე არის ზრდა პატარა ევროპულ ქვეყნებში და არ არის გასაკვირი, რომ ჩვენც ზრდა გვაქვს. დღევანდელი შემთხვევათა რიცხვი დილის 9 საათისთვის არის 478, სულ 12 272 შემთხვევაა დაფიქსირებული.
ყველაზე ცხელ წერტილად ჯერ-ჯერობით აჭარა რჩება, სადაც 196 შემთხვევა გვაქვს, თუმცა როგორც დინამიკიდან ვხედავთ, გარკვეული სტაბილიზაცია შეინიშნება აჭარაში, პერიოდულად ინფიცირებულთა რიცხვი მცირდება.
შემთხვევათა გავრცელების მაჩვენებლით, 178 ინფიცირებულით, მეორე ადგილზეა თბილისი, შემდეგ იმერეთი 65, გურიაში 1 შემთხვევა გვქონდა, მცხეთ-მთიანეთში 4, სამეგრელო-ზემო სვანეთში 13, ქვემო ქართლში 15 და შიდა ქართლში 6. ჯამში სულ არის 478 ახალი შემთხვევა.
დადასტურებული პაციენტების უმრავლესობა, არის სიმპტომებიანი, რომლებმაც მიმართეს კლინიკებს ან ამბოლატორიულ დაწესებულებებს, ასეთი იყო 248.
128 გახლავთ დადასტურებულ შემთხვევასთან კონტაქტი, სადაც დადასტურდა შემდგომში კოვიდ ინფექცია, სამედიცინო პერსონალი 17, თვითიზოლაციაში მყოფი 37, სხვა დანარჩენ რისკ-ჯგუფებში 41 შემთხვევა გვქონდა.
გამოჯანმრთელებულთა რიცხვია 211, ჯერ-ჯერობით ეს რაოდენობა არ ჭარბობს ინფიცირებულთა რაოდენობას.
აჭარაში, მიუხედავად იმისა, რომ სტაბილიზაციის პროცესი მიმდინარეობს, მაინც არ ჩაითვალა საჭიროდ შემზღუდველი ღონისძიებების მოხსნა.
სანამ ერთი ინკუპაციური პერიოდი მაინც არ დასრულდება,შემზღუდველი ღონისძიებების შემსუბუქება გადავადდება. პანდემია არ დასრულდება კიდევ კარგა ხანს და ჩვენ უნდა მივეჩვიოთ ამ ვირუსთან ერთად თანაცხოვრებას,“ – განაცხდა ამირან გამყრელიძემ.
ავტორი
ემილი ფეიქრიშვილი
