“მტრულ ძალებს არჩევნებით კიდევ ერთხელ დავამარცხებთ” – “ქართული ოცნება” მარნეულში მომხდარ ინციდენტს ეხმაურება

111

„ქართული ოცნების“ პრესსამსახური სოციალურ ქსელში მარნეულის მუნიციპალიტეტში მომხდარ ინციდენტთან დაკავშირებით განცხადებას ავრცელებს.

მმართველი პარტიის განცხადებაში წერია, რომ „ნაციონალური მოძრაობა“ დაადგა ძალადობრივ და პროვოკაციულ წინასაარჩევნო კამპანიას, რასაც მოჰყვება საკადრის პასუხი არა ფიზიკური, არამედ მშვიდობიანი, არჩევნების გზით:

მარნეულის მუნიციპალიტეტში, „ნაციონალური მოძრაობის” წევრების მხრიდან დღეს საოლქო ადმინისტრაციაში შეჭრის მცდელობა და ცესკოს ერთ-ერთი თანამშრომლის მიმართ ფიზიკური ძალადობა ვიხილეთ. ადგილზე იმყოფებოდა პოლიცია და აღნიშნული საქმის გამოძიება დაწყებულია.

თუმცა, „ნაციონალური მოძრაობის” აქტივმა ძალადობა არ იკმარა და ამჯერად, საღამოს საათებში, ალკოჰოლური ზემოქმედების ქვეშ მყოფი მათი აქტივისტები “ქართული ოცნების” ოფისთან მივიდნენ და ჩვენს მხარდამჭერებზე როგორც სიტყვიერად, ისე ფიზიკურად ძალადობა დაიწყეს, რის შემდეგაც ვითარება გართულდა და კონფლიქტი ორმხრივ დაპირისპირებაში გადაიზარდა.

სახელმწიფო არ დაუშვებს დესტაბილიზაციისა და არეულობის მცდელობებს და ყველა პირი, ვინც კანონის ფარგლებს გაცდება, უმკაცრესად დაისჯება.

როგორც ჩანს, „ნაციონალური მოძრაობა” საბოლოოდ დაადგა წინასაარჩევნო კამპანიაში პროვოკაციებისა და ძალადობის გზას, რასაც განსაკუთრებული დაფიქრება, მოთმინება და ანალიზი სჭირდება.

ყველას მოგიწოდებთ, რომ მათ ქმედებებს საკადრისი პასუხი გავცეთ არა ფიზიკური, არამედ მშვიდობიანი, არჩევნების გზით. ჩვენ ვართ პასუხისმგებლიანი გუნდი, რომელიც 2012 წლის პირველ ოქტომბერს, ძალადობრივი რეჟიმის პირობებში მშვიდობიანი გზით, არჩევნების მეშვეობით მოვიდა ხელისუფლებაში და მტრულ ძალებს არჩევნებით კიდევ ერთხელ დავამარცხებთ“, – წერია „ქართული ოცნების“ განცხადებაში.

ავტორი
საბა გოგებაშვილი

კომენტარები