საქართველოს პარლამენტმა შრომის კოდექსის ახალი კანონპროექტი წარადგინა. შრომის კოდექსში ცვლილებების შეტანას 82-მა დეპუტატმა დაუჭირა მხარი. ახალი კანონი ქვეყანაში 2021 წლის 1 იანვრიდან ამოქმედდება:
„განახლდა შრომის კოდექსში შესატანი ცვლილებები, ეს არის ფუნდამენტური პაკეტი, რომელიც ითვალისწინებს შრომის ინსპექციის სრული დატვირთვით ამოქმედებას. კანონში შეტანილია ახალი, ძალიან მნიშვნელოვანი ცვლილებები, რაც გააუმჯობესებს მდგომარეობას საქართველოში და შეიქმნება ძლიერი ინსტიტუციური მექანიზმი, რომელიც უზრუნველყოფს შრომითი უფლებების დაცვას“, – განმარტავს „ქართული ოცნება – დემოკრატიული საქართველოს“ აღმასრულებელი მდივანი, პარლამენტის წევრი, ირაკლი კობახიძე.
აღნიშნულ საკითხთან დაკავშირებით კომენტარი გააკეთა კანონპროექტის ავტორმა, დიმიტრი ცქიტიშვილმა:
„ახალი კანონი ფუნდამენტურად ცვლის მდგომარეობას ქვეყანაში. რეალურად, ჩვენ ჩამორჩენა გვქონდა წლების განმავლობაში, შრომის უფლებები არ იყო იმ დონეზე დაცული, როგორც ეს მოეთხოვება ნორმალურ სახელმწიფოს. თითოეულ კომპანიას უნდა ჰქონდეს მოლოდინი, რომ ნებისმიერ მომენტში, შეიძლება მივიდეს ინსპექცია, ამიტომ, ყოველთვის, უნდა იყვნენ მზად და მუდმივად დაიცვან შრომითი უფლებები“, – აცხადებს კანონპროექტის ავტორი, პარლამენტის დამოუკიდებელი წევრი, დიმიტრი ცქიტიშვილი.