„ქართული ოცნების“ ოფისში გამართულ საგანგებო ბრიფინგზე, ბოლნისში მომხდარ დაპირისპირებასთან დაკავშირებით, კომენტარი გააკეთა პარლამენტის ვიცე-სპიკერმა, მამუკა მდინარაძემ. მისი აზრით, მომხდარი ფაქტი “ნაციონალური მოძრაობის” პროვოკაციის შედეგია:
“მსურს გამოვეხმაუროთ ბოლნისში მომხდარ ინციდენტს, სადაც ნაციონალური მოძრაობის პროვოკაციული ქმედებებისა და ძალადობის შედეგად კონფლიქტი გადაიზარდა ფიზიკურ დაპირისპირებაში. რეალურად, სიმართლე იმაში მდგომარეობს, რომ ნაციონალური მოძრაობის წარმომადგენლები, როგორც კონფლიქტის, ისე წინა დღეების განმავლობაში, მუდმივად ცდილობდნენ პროვოკაციების მოწყობას. რაც გამოიხატებოდა სხვადასხვა ქმედებებში“, – აცხადებს მამუკა მდინარაძე.
მმართველი პარტიის ერთ-ერთი ლიდერი მომხდარ ფაქტზე საუბრისას აცხადებს, რომ “ნაციონალური მოძრაობის” წარმომადგენლების მხრიდან ფიზიკური დაპირისპირების შედეგად, “ქართული ოცნების” აქტივისტები არიან დაზარალებულები და რამდენიმე მათგანი იმყოფება საავადმყოფოში. მდინარაძე, ინციდენტში, ოპოზიციას ადანაშაულებს:
“ფაქტია, “ნაციონალურ მოძრაობაში” კარგად იციან, რომ არჩევნებში დამარცხებისთვის არიან განწირულები და ერთადერთი, რაც დარჩენიათ, არის მათი უცვლელი მეთოდები, – სიცრუისა და ძალადობის გამოყენება, რათა პროვოკაციების და ვითარების ესკალაციის ფონზე მიიღონ რაიმე სარგებელი“, – განაცხადა მამუკა მდინარაძემ.
მამუკა მდინარაძე, მათ აქტივისტებს, რიგით ამომრჩევლებს მოუწოდებს, რომ არ აყვნენ პროვოკაციას და წინაასარჩევნო კამპანია წარიმართოს მშვიდობიან გარემოში, რათა არჩევნები ჩატარდეს მაღალი დემოკრატიული სტანდარტებით:
„არავითარ შემთხვევაში არ უნდა წამოვეგოთ პროვოკაციებს. ერთადერთი, რაც “ნაციონალურ მოძრაობას” და იმ ცნობილ კლასტერს აქვს დარჩენილი, არის პროვოკაციების და ტელევიზიების საშუალებით სიკვდილის პროპაგანდის, სიცრუისა და ძალადობის გზა, სადაც პროვოკაცია არის მათთვის ერთადერთი გამოსავალი“, – კომენტარი გააკეთა მამუკა მდინარაძემ