დღეს ინფექციურ საავადმყოფოსთან გაიმართა ბრიფინგი საქართველოში COVID-19-ით დაავადებულთა განახლებულ სტატისტიკაზე. აღნიშნულ საკითხზე კომენტარი გააკეთა ინფექციური პათოლოგიისა და შიდსის ცენტრის ბოქსირებული განყოფილების უფროსმა, მარინა ენდელაძემ.
მან კონკრეტულად მიმოიხილა ინფიცირებულთა მონაცემები საქართველოს ყველა რეგიონში და აღნიშნა, რომ მიუხედავად ტესტების რაოდენობის მატებისა, შესაძლებელია პროცესის შეჩერება და დასტაბილურება:
„საერთო ჯამში გახლავთ 5254 კოვიდინფიცირებული პაციენტი. მათ შორის, 294 ახალი დადასტურებული შემთხვევა, 27 სექტემბრის მდგომარებით. რაც შეეხება რეგიონებში განაწილების პროცენტულ/რაოდენობრივ მაჩვენებელს, კვლავ, აჭარის რეგიონი ლიდერობს 66%-ით და ეს შეესაბამება 193 ახალ პაციენტს. თბილისში დაფიქსირებულია 15% – 43 პაციენტი, გურიაში -16 პაციენტი, იმერეთში -14, სამეგრელო-ზემო სვანეთში – 11, სამცხე-ჯავახეთსა და ქვემო ქართლში 5-5, შიდა ქართლში – 4, კახეთში – 2 და მცხეთა-მთიანეთში – 1 ახალი დადასტურებული შემთხვევა.
თბილისში ვხედავთ, რომ ძალიან დიდი რაოდენობა არაა დაფიქსირებული და მხოლოდ 15 პროცენტია. ჯერ-ჯერობით “მწვანე ზონაში” ვართ და ვფიქრობ არ იქნება მატება. დღევანდელი დღე გარკვეულწილად საიმედოა, რადგან არ არიან ინფიცირებულები დიდი რაოდენობით, მიუხედავად იმისა, რომ ტესტების რაოდენობამ იმატა. ამდენად, ვფიქრობ რომ რაღაცნაირად დასტაბილურდება და მოხდება პროცესის შენელება, შეჩერება“, – განმარტავს მარინა ენდელაძე.
ბოლო მონაცემებით, 28 პაციენტია გარდაცვლილი. ინფორმაცია ახალი გარდაცვლილის თაობაზე არ ვრცელდება:
„გუშინ, გარდაიცვალა ერთი პაციენტი, რომელსაც ჰქონდა თანმხლები მძიმე დაავადებები. დღევანდელი დღის მონაცემები ჯერ-ჯერობით არ მაქვს“, – აცხადებს მარინა ენდელაძე.
