საზოგადოებრივი მაუწყებლის სამეურვეო საბჭომ გენერალურ დირექტორად თინათინ ბერძენიშვილი ღია კენჭისყრით აირჩია. მის კანდიდატურას სამეურვეო საბჭოს რვა წევრმა დაუჭირა მხარი.
რაც შეეხება სხვა კანდიდატებს, ერთი ხმა ხათუნა ლაგაზიძემ მიიღო, ხოლო ირმა სოხაძემ – არც ერთი.
თინათინ ბერძენიშვილი საქართველოს პირველი არხის გენერალური დირექტორის პირველი მოადგილე იყო და ამჟამად, გენერალური დირექტორის მოვალეობას ასრულებს; არის ევროპის მაუწყებელთა კავშირის (EBU) მედიაკომიტეტის წევრი და ამავე ორგანიზაციის გენდერული საკითხების ჯგუფის ხელმძღვანელი.
ბერძენიშვილის განცხადებით, სამეურვეო საბჭომ მიიღო ლოგიკური გადაწყვეტილება, რადგან საზოგადოებრივ მაუწყებელში „დაწყებული საქმე უნდა გაგრძელდეს“.
„პირველ რიგში, ვფიქრობ, ძალიან ლოგიკური გადაწყვეტილება იყო. დაწყებული საქმე უნდა გაგრძელდეს, რადგან ეხება ტექნოლოგიურ გადაიარაღებას, ახალ შენობას – ეს არის პროცესი, რომელიც დაწყებულია და ამ საკითხზე არსებობს სამეურვეო საბჭოს გადაწყვეტილება, მათი გადაწყვეტილებაა, რომ ეს ყველაფერი გაკეთდეს.
ხშირად გვავიწყდება, რომ გარდა მედიაკონტენტისა, პროდუქტის შინაარსისა, რომელიც ჩემთვის უმნიშვნელოვანესია, არის მართვითი პროცესები. ყოველთვის ვამბობ, ორგანიზაციის მართვისას გასათვალისწინებელია კონკრეტული ციფრები, ერთგვარი „ექსელის“ ფაილი. საკმაოდ რთული პროცესია, იმ გაგებით, რომ ორგანიზაციაში ახალ ადამიანს ძალიან გაუჭირდებოდა ამ პროცესის დალაგება, ამ პროცესში გარკვევა და რბილად რომ ვთქვათ, შემდეგ პროცესის მართვა“, – აცხადებს ბერძენიშვილი.
სამეურვეო საბჭოს 22 სექტემბრის გადაწყვეტილებით, მეორე ტურში გადავიდნენ თინათინ ბერძენიშვილი, ირმა სოხაძე, ხათუნა ლაგაზიძე და ალექსანდრე ვახტანგოვი. ამასთან, ალექსანდრე ვახტანგოვმა გასაუბრების დასრულებისას განაცხადა, რომ კანდიდატურას ხსნის.
სსიპ „საზოგადოებრივი მაუწყებლის“ გენერალური დირექტორის ვაკანტურ თანამდებობაზე სამეურვეო საბჭოს მიერ გამოცხადებული ღია კონკურსი 17 სექტემბერს დასრულდა. კონკურსში რვა კანდიდატი მონაწილეობდა.
ავტორი
საბა გოგებაშვილი
