საქართველოს პრემიერ მინისტრმა, გიორგი გახარიამ სიტყვით მიმართა გაეროს გენერალური ასამბლეის წევრებს 75-ე სესიაზე. აღსანიშნავია, რომ მიმართვა განხორციელდა დისტანციურად ვიდეო მასალის მეშვეობით. პრემიერ-მინისტრმა, ყურადღება გაამახვილა ოკუპირებულ ტერიტორიებზე და მიმართა საოკუპაციო ხაზის მეორე მხარეს მცხოვრებ მოსახლეობას. მთავრობის მეთაურმა რუსეთის მიერ განხორციელებული უწყვეტი უკანონო ბორდერიზაციისა და პროვოკაციების შესახებაც ისაუბრა, რასაც ოკუპირებულ ტერიტორიებზე ახორციელებს:
„საყოველთაოდ ცნობილია, რომ 2008 წელს საქართველოს წინააღმდეგ რუსეთმა განახორციელა სამხედრო აგრესია, რომლის შეკავება საერთაშორისო თანამეგობრობის, პირველ რიგში ამერიკის შეერთებული შტატების და ევროკავშირის მტკიცე მხარდაჭერით გახდა შესაძლებელი. ჩვენი ქვეყნის ტერიტორიების 20%, აფხაზეთი და ცხინვალი, ოკუპირებულია რუსეთის მიერ. დღესაც კი, როდესაც მთელი მსოფლიო “COVID 19″-ს ებრძვის, რუსეთი არ წყვეტს უკანონო ბორდერიზაციას და პროვოკაციებს ოკუპირებულ ტერიტორიებზე, აგრძელებს დეზინფორმაციას ,,რიჩარდ ლუგარის’’ სახელობის ჯანმრთელობის დაცვის კვლევით ცენტრთან მიმართებაში.
საქართველოს მთავრობის არჩეული პოლიტიკაა დიალოგის გზით მშვიდობის მიღწევა და კონფლიქტის მშვიდობიანი მოგვარება, რაც ითვალისწინებს 2008 წლის 12 აგვისტოს ცეცხლის შეწყვეტის შეთანხმების იმპლემენტაციას, ხოლო, მეორე მხრივ, – ომით გაყოფილი საზოგადოების შერიგებას, ნდობისა და ურთიერთობების აღდგენას.
ჩვენი მიზანია აფხაზეთისა და ცხინვალის რეგიონების განვითარება და იქ მცხოვრები ადამიანების საცხოვრებელი პირობების გაუმჯობესება, მათთვის ჩვენს ხელთ არსებული ყველა სიკეთისა და მონაპოვრის გაზიარება, როგორც მშვიდობიან, თავისუფალ, დემოკრატიულ და კორუფციისგან თავისუფალ საზოგადოებაში ცხოვრება, ისე ევროკავშირთან დაახლოების შედეგად მიღებული შესაძლებლობები – თავისუფალი ვაჭრობის რეჟიმი და უვიზო მიმოსვლა.
მივმართავ ჩვენს თანამემამულეებს, საოკუპაციო ხაზების მეორე მხარეს, – საქართველოს სურს და შეუძლია თქვენთვის ამ ყველაფრის გაზიარება. ჩვენ ერთად შეგვიძლია თქვენთვის და თქვენი შვილებისთვის შევქმნათ უკეთესი მომავალი და ამასთანავე, შეინარჩუნოთ უნიკალური კულტურა და თვითმყოფადობა, რაც ასევე საერთო მემკვიდრეობის ნაწილია.
მინდა დიდი მადლობა გადავუხადო ჩვენს ყველა პარტნიორსა და მეგობარს, მუდმივად გვერდში დგომისთვის, საქართველოს სუვერენიტეტის, ტერიტორიული მთლიანობისა და არაღიარების პოლიტიკის მხარდაჭერისთვის. ჩვენთვის მნიშვნელოვანია, რომ სულ რამდენიმე კვირის წინ, გლობალური პანდემიის პირობებში, ქვეყნების უპრეცედენტოდ მაღალმა რიცხვმა მხარი დაუჭირა საქართველოს და 54 ქვეყნის მიერ ინიცირებულ ჰუმანიტარული ხასიათის რეზოლუციას – „აფხაზეთიდან, საქართველო და ცხინვალის რეგიონიდან/სამხრეთ ოსეთი, საქართველო იძულებით გადაადგილებულ პირთა და ლტოლვილთა სტატუსის შესახებ“, რომელიც ადასტურებს მათ უფლებას, ღირსეულად დაბრუნდნენ წინაპრების სახლებში,“- განაცხადა გიორგი გახარიამ.
ავტორი
ანა ბოგვერაძე
