თავს ესხმიან პარტიების წარმომადგენლებს, შტაბებს და აქტივისტებს – გუბაზ სანიკიძე

206

პარლამენტის ყოფილმა დეპუტატმა, ისტორიკოსმა გუბაზ სანიკიძემ სააგენტო “პარალელთან” კომენტარი გააკეთა წინასაარჩევნო პროცესებთან დაკავშირებით. ოპოზიციონერმა ლიდერმა შეაფასა პროდასავლური პარტიების კონკურენცია და განმარტა, თუ რა იქნებოდა მომგებიანი ოპოზიციური პარტიებისათვის:

,,თუ შევაფასებთ პოლიტიკური პარტიების საარჩევნო კამპანიას, შეიძლება ითქვას, რომ პროდასავლური ძალებში დღეს არის ჯანსაღი კონკურენცია, რაც ახასიათებს არჩევნებს. როდესაც პოლიტიკური მოძრაობები არ ქმნიან ერთიან სიას, მათ აქვთ უფლება ერთმანეთი გააკრიტიკონ და განსხვავებული მოსაზრებებიც არ გაითვალისწინონ.

ასევე, არ მგონია, რომ პროდასავლურ პარტიებს შორის არსებული კონკურენცია ხელისუფლებას რაიმეში წაადგება. არსებულ შემთხვევაში მთავრობას საქმე ექნება, რამდენიმე პოლიტიკურ ძალასთან, რომლებთანაც კონკურენციაში იქნება შესული. მე ვფიქრობ, ხელისუფლებას გაუჭირდება მთლიანი პოლიტიკური სპექტრის გაკონტროლება.

ჩემი სუბიექტური მოსაზრებაა, რომ უმჯობესი იქნებოდა შექმნილიყო გაერთიანებული სია, რაც გაამართლებდა საქართველოში. რადგან არ გამოთქვეს პოლიტიკურმა პარტიებმა ამის სურვილი, ეს არაფერს ნიშნავს, ასეც შეიძლება მოვუგოთ მმართველ პარტიას.

აღსანიშნავია, რომ საარჩევნო პროცესი მიმდინარეობს წნეხის ქვეშ ხელისუფლების მხრიდან. ვხედავთ ამომრჩევლების მოსყიდვას, დაშინებას, ადმინისტრაციული რესურსის გამოყენებას, კრიმინალია ჩართული ამ საქმეში, ხელისუფლების მხრიდან.

თავს ესხმიან პარტიების წარმომადგენლებს, შტაბებს და აქტივისტებს. ხელისუფლებას ტოტალური ომი აქვს გამოცხადებული დემოკრატიასთან,’’ – განაცხადა გუბაზ სანიკიძემ.

ავტორი
ანა ბოგვერაძე

კომენტარები