გიორგი ვაშაძის მიერ პრემიერ-მინისტრ გიორგი გახარიას დებატებში გამოწვევის თაობაზე, საინფორმაციო სააგენტო „პარალელთან“, კომენტარს აკეთებს საქართველოს მე-4 პრეზიდენტის მრჩეველი საგარეო საქმეთა საკითხებში, ექსპერტი თენგიზ ფხალაძე. მისი აზრით დებატები აუცილებელია, რომ ამომრჩეველმა, საჭირბოროტო საკითხებთან მიმართებაში, მხარეების დამოკიდებულების შესაბამისად გააკეთოს არჩევანი:
“უპირველეს ყოვლისა ვფიქრობ, რომ დებატები საარჩევნო კამპანიის განუყოფელი ნაწილია და შესაბამისად აუცილებელია. ამიტომაც, პოლიტიკოსები რაც უფრო ხშირად გამართავენ დისკუსიას და ნაკლებად მოვისმენთ ცალმხრივ განცხადებებს, მით უფრო კარგი იქნება ამომრჩევლებისათვის.
გიორგი ვაშაძის ინიციატივა, დებატების გამართვასთან დაკავშირებით, აბსოლიტურად მართებული და საჭირო შეთავაზებაა, მით უფრო არჩევნების პერიოდში. მე მივესალმები, რომ ასეთი დებატები ხშირად იმართებოდეს და საარჩევნო კამპანია ორიენტირებული იყოს პლატფორმების ჭიდილზე. მოსახლეობა ნათლად უნდა ხედავდეს, ამა თუ იმ საკითხთან დაკავშირებით, კანდიდატების თუ პოლიტიკური პარტიების დამოკიდებულებას საჭირბოროტო საკითხებთან მიმართებაში, რაც თავისთავად გაუადვილებთ მათ არჩევანის გაკეთებას და ყოველივე ეს წაადგება პოლიტიკურ პროცესს“, – აღნიშნა თენგიზ ფხალაძემ.
ავტორი
ნინო ცინცაძე
