საქართველოს პრემიერ-მინისტრმა, გიორგი გახარიამ განაცხადა, რომ დღეიდან ღია ცის ქვეშ იკრძალება 200-ზე მეტი ადამიანის თავშეყრა. აღნიშნული გადაწყვეტილების მიზეზად დაასახელა ის ფაქტი, რომ რესტორანში გამართული ერთ-ერთი ქორწილი გახდა ფაქტობრივად ხუთი დამატებითი კლასტერი წარმოქმნის წყარო და მოქალაქეების ჯანმრთელობის მიზნით აუცილებელი გახდა აღნიშნული პრევენციული ღონისძიების გატარება:
“დღეიდან, სპორტული თუ კულტურული ღონისძიებებისთვის, იკრძალება 200-ზე მეტი ადამიანის შეკრება ღია ცის ქვეშ. დახურულ შენობებში, დღეის მდგომარეობით, ისედაც აკრძალულია.
იკრძალება რიტუალური ღონისძიებებიც. სამწუხაროდ, გვესმის, რომ ამას გარკვეული დისკომფორტი და შეიძლება, გაღიზიანებაც მოჰყვეს ჩვენი მოქალაქეების, თუმცა ბოლო საგულისხმო მაგალითი – ერთ-ერთმა ქორწილმა, რომელიც ჩატარდა თბილისში (არ დავასახლებ, რომელ რესტორანში), ფაქტობრივად ხუთი დამატებითი კლასტერი შეგვიქმნა. ერთი ცაგერში, მზარდი თან, ერთი ქუთაისში, ზუგდიდში და ა.შ. ჩვენ, ამ წერტილებში, ინფიცირების რაოდენობის ზრდას ველოდებით და ამის გამავრცელებელი ძირითადი ღონისძიება, სამწუხაროდ, იყო ქორწილი.
ჩვენ გავხდით იძულებული, რომ მსგავსი რიტუალური ღონისძიებების აკრძალვისთვის დადგენილებაში დაგვემატებინა – 10 ადამიანზე მეტი. ეს მიმართულია იმისთვის, რომ დავიცვათ ჩვენი მოქალაქეების ჯანმრთელობა,” – განაცხადა გიორგი გახარიამ.
