საქართველოს საგარეო საქმეთა მინისტრმა, დავით ზალკალიანმა განაცხადა, რომ ჩვენი ქვეყნისთვის უაღრესად მნიშვნელოვანია სავიზო ლიბერალიზაცია. მინისტრმა ასევე აღნიშნა, რომ სირთულეები, რომლებიც ექმნებოდათ მოქალაქეებს, შემსუბუქდება, ვინაიდან აქ მნიშვნელოვანია სწორი ბალანსი ადამიანის უფლებებსა და ამ მონაპოვრის განმტკიცებასთან ფარდობაში:
,,სავიზო ლიბერალიზაცია არის ჩვენი უაღრესად მნიშვნელოვანი მონაპოვარი ისე, როგორც ასოცირების შეთანხმება, ღრმა და ყოვლისმომცველი თავისუფალი ვაჭრობა. სავიზო ლიბერალიზაცია არის არა მხოლოდ ტექნიკური გადაწყვეტილება ევროკავშირის მხრიდან, არამედ მნიშვნელოვანი პოლიტიკური გზავნილი. ეს არის ის სიკეთე, რომლითაც ასობით ათასი ჩვენი მოქალაქე სარგებლობს. ამიტომ, ჩვენ კითხვის ნიშნის ქვეშ არ უნდა დავაყენოთ თავისუფალი მიმოსვლის მნიშვნელობა.
არავითარ შემთხვევაში არ უნდა დავუშვათ, შეჩერების მექანიზმის ამოქმედება. მაშინ, როდესაც გარკვეული პერიოდის განმავლობაში, ჩვენ გვქონდა მზარდი დინამიკა თავშესაფრის მაძიებლთა მიმართულებით. სწორედ ამან განაპირობა გადაწყვეტილება, რომელიც მიღებული იყო ჩვენს კანონმდებლობაში, ძალიან მჭიდრო კოორდინაციითა და კომუნიკაციით ჩვენს ევროპელ პარტნიორებთან, ასევე მათ ექსპერტებთან ერთად, ვინაიდან აქ მნიშვნელოვანია სწორი ბალანსი ადამიანის უფლებებსა და ამ მნიშვნელოვანი მონაპოვრის განმტკიცებასთან ფარდობაში.
მე ვფიქრობ, რომ არ დაზარალდება ჩვენი მოქალაქეების უფლებები. ეს არის გაკეთებული იმისათვის, რომ ჩვენს მოქალაქეებს, რომლებმაც უკვე ისარგებლეს და მომავალში ისარგებლებენ ამ სიკეთით, საფრთხე არ შეექმნათ. ეს გაკეთებულია ჩვენი მოქალაქეების უსაფრთხოებისათვის და იმისათვის, რომ არანაირი დისკომფორტი არ ჰქონდეთ.
ევროკავშირიდან გამობრუნებულ ადამიანებზე, თავად მოქალაქემ უნდა იზრუნოს. მათ შორის ფინანსური რესურსის თვალსაზრისით და დასაბრუნებელი ბილეთების აღების კუთხით.
ამ ცვლილებით, მათ შეუმსუბუქდებათ სირთულეები, რომლებიც ადრე ექმნებოდათ. ეს არის, მნიშვნელოვანი გზავნილი ჩვენი ევროპელი პარტნიორებისთვის და დარწმუნებული ვარ, რომ არც საშუალო ვადიან, არც გრძელვადიან პერსპექტივაში შეჩერების მექანიზმის ამოქმედების არანაირი საფუძველი აღარ იარსებებს ამ კანონის ამოქმედების შემდეგ,“ – განაცხადა დავით ზალკალიანმა.
ავტორი
ანა ბოგვერაძე
