ვინც იცოდა ბავშვის მიმართ ძალადობის თაობაზე, არ დაიცვა, ან დატოვა ის მოძალადის ხელში პასუხისმგებლობა ეკისრება – ნინო ლომჯარია

სახალხო დამცველი თერჯოლაში არასრულწლოვნის თვითმკვლელობამდე  მიყვანის ფაქტზე მამის  დაკავებას გამოეხმაურა. ნინო ლომჯარია აცხადებს, რომ საქართველოში ბავშვები ძალადობის პირისპირ მარტონი არიან და აღნიშნავს, რომ იმ პირს, რომელმაც იცოდა ბავშვის მიმართ ძალადობის თაობაზე, პასუხისმგებლობა ეკისრება.

„ჩვენს ქვეყანაში ბავშვები ოჯახში თუ საჯარო სივრცეში მარტონი არიან ძალადობის პირისპირ, რადგან:

მათ არა აქვთ ინფორმაცია, ვის მიმართონ და რა მოითხოვონ, რადგან სკოლაში ამას არავინ ასწავლით;

არ აქვთ გარშემომყოფთა იმედი, რადგან ბავშვს არავინ უსმენს და კიდევ უფრო იშვიათად უჯერებს;

სოციალურ სამსახურს არა აქვს საკმარისი რესურსი, ხოლო სამართალდამცავ უწყებას ბავშვთა მიმართ ძალადობის პრევენციის კვალიფიკაცია და მგრძნობელობა;

ბავშვზე ზრუნვისა და დაცვის სისტემა არსებითი გამოწვევების წინაშე დგას;

არ არსებობს ოჯახში ძალადობის მსხვერპლი ბავშვების მხარდაჭერის ეფექტური სერვისი, მინიმალურია მათთან ფსიქოლოგის ჩართულობა;

არაერთი ინიციატივა ბავშვის უფლებების სწავლების თუ ოჯახში ძალადობისაგან დაცვის მექანიზმების მხარდასაჭერად რელიგიური თუ ფსევდო პატრიოტული წინააღმდეგობების გამო ფერხდება;

და ბოლოს, ხაზი უნდა გაესვას ყველა იმ პირის პასუხისმგებლობას, ვინც იცოდა ბავშვის მიმართ ძალადობის თაობაზე, არ დაიცვა, ან დატოვა ის მოძალადის ხელში“, – წერს ნინო ლომჯარია.

შეგახსენებთ, რომ თერჯოლაში სამართალდამცავებმა  11 წლის ბავშვის თვითმკვლელობამდე მიყვანის მუხლით,  მამა დააკავეს.

ავტორი
მარიკა ხორავა