ჩოხატაურის მუნიციპალიტეტში ნეპოტიზმის ფაქტებთან დაკავშირებით ბრიფინგი გამართა “ევროპული საქართველოს” გურიის მაჟორიტარობის კანდიდატმა ხათუნა გოგორიშვილმა. მისი განცხადებით, ჩოხატაურში ადგილი აქვს “ქართული ოცნების” ნეპოტისტურ პოლიტიკას, კერძოდ ჩოხატაურის მუნიციპალიტეტის მიერ ერთ-ერთ ორგანიზაციასთან გაფორმებული ხელშეკრულების შედეგად დასაქმდა მუნიციპალიტეტის თანამშრომლების ცოლები:
“მინდა გითხრათ, რომ ჩოხატაურის მუნიციპალიტეტმა ერთ-ერთ ორგანიზაციასთან გააფორმა ხელშეკრულება, ურთიერთგაგების მემორანდუმი პროგრამაზე რომლის სახელია “ინტეგრირებულ საქმიანობათა დღის ცენტრი ჩოხატაურში”. აღნიშნული პროგრამა მიზნად ისახავს სოციალურად დაუცველი ადამიანების დახმარებასა და მათ ჯანმრთელობაზე ზრუნვას.
ამ პროგრამისთვის ჩოხატაურის მუნიციპალიტეტის ბიუჯეტიდან გადარიცხულ იქნა 96500 ლარი. აღნიშნული თანხიდან 87500 ლარი ამ პროგრამაში დასაქმებულ 7 თანამშრომლის ხელფასს მოხმარდა და მხოლოდ 9000 მოხმარდა პროგრამას. თავისთავად უკვე ეს ფაქტი არის კითხვის ნიშნების შემცველი. მინდა მოგაწოდოთ ინფორმაცია, ვინ არიან ეს ადამიანები და ვის უხდის ჩოხატაურის მუნიციპალიტეტის ბიუჯეტი ხელფასს ყოველთვიურად: მერიის სოციალური სამსახური განყოფილების უფროსის ცოლი, მერის მოადგილის ცოლი, საკრებულოს საფინანსო-საბიუჯეტო კომიტეტის თავმჯდომარის ცოლი, ჩოხატაურის ელექტროქსელების ხელმძღვანელის ცოლი. შესაბამისად, ამ პროგრამას, შეგვიძლია ძალიან გამართულად დავარქვათ ცოლების საქმიანობათა დღის ცენტრი ჩოხატაურში,” – განაცხადა ხათუნა გოგორიშვილმა.
ავტორი
თამუნა მახარაშვილი
