საოკუპაციო რეჟიმის მიერ საქართველოს მოქალაქის, ხვიჩა მღებრიშვილისთვის უკანონო პატიმრობის შეფარდებასთან დაკავშირებით საკითხს „სტრატეგია აღმაშენებლის“ სპიკერი ეხმაურება.
თეონა აქუბარდიას თქმით, აღნიშნული ქმედება, რუსეთის მხრიდან, აგრესიული პოლიტიკის კიდევ ერთი გამოვლინებაა და საქართველომ ოკუპანტ ქვეყანას მაღალი პოლიტიკური ფასი უნდა გადაახდევინოს.
„სტრატეგია აღმაშენებლის“ ერთ-ერთი ლიდერი საერთაშორისო თანამეგობრობას მიმართავს, რათა აღნიშნულ საქმეში აქტიურად ჩაერთონ და საქართველოს მოქალაქეების უკანონო პატიმრობიდან გათავისუფლება დაუყოვნებლივ მოხდეს.
„რუსეთის საოკუპაციო რეჟიმის მიერ ჩვენი მოქალაქის, ხვიჩა მღებრიშვილისთვის სრულიად აბსურდული ბრალდებით პატიმრობის მისჯა კიდევ ეთი გამოვლინებაა იმისა, თუ როგორ უპირისპირდება რუსეთი საქართველოს და მისი ხალხის ინტერესებს.
სამწუხაროდ, დღემდე წინასწარი დაკავების იზოლატორში რჩება ზაზა გახელაძეც, რომელსაც ცხინვალის საოკუპაციო რეჟიმის წარმომადგენლებმა ჯერ ესროლეს, დაჭრეს და შემდეგ ჩვენ მიერ კონტროლირებადი ტერიტორიიდან გაიტაცეს.
„სტრატეგია აღმაშენებლის“ გუნდი მოუწოდებს რუსეთს, უკანონოდ დაპატიმრებული ჩვენი მოქალაქეები დაუყოვნებლივ გაათავისუფლოს. ასევე მივმართავთ საერთაშორისო თანამეგობრობას, მათი გათავისუფლების საქმეში აქტიურად ჩაერთონ.
მიგვაჩნია, რომ საქართველომ რუსეთს მცოცავი ოკუპაციისთვის და მწვავე ჰუმანიტარული კრიზისის შექმნისთვის მაღალი პოლიტიკური ფასი უნდა გადაახდევინოს.
„ქართული ოცნების“ პოლიტიკამ რუსეთთან დაკავშირებით, სრული ფიასკო განიცადა. მეტიც, სამწუხაროდ, საქართველოს დღეს არ გააჩნია არც განახლებული ეროვნული უსაფრთხოების სტრატეგია და არც საფრთხეების შეფასების დოკუმენტი მომატებულ საფრთხეებთან და რუსეთის ჰიბრიდულ ომთან დასაპირისპირებლად.
იმისთვის, რომ საქართველომ რუსული აგრესიისგან ეროვნული ინტერესებისა და საკუთარი ხალხის დაცვა უზრუნველყოს, სასიცოცხლოდ მნიშვნელოვანია განახლებული უსაფრთხოების სტრატეგია შეიქმნას და ჩვენ, „სტრატეგია აღმაშენებელი“ 31 ოქტომბრის შემდეგ, ეროვნული თანხმობის საფუძველზე ყველაფერს გავაკეთებთ ამის შესაქმნელად“, – აცხადებს თეონა აქუბარდია.
ავტორი
ეკა ქაჩლიშვილი
