საქართველოს ეკონომიკისა და მდგრადი განვითარების მინისტრის ნათია თურნავას განცხადებით საქართველო-ბელარუსს შორის ჩარტერული რეისები პერიოდულად სრულდება და მისთვის გაუგებარია, თუ რა მიზანს ისახავდა 16 აგვისტოს თბილისიდან განხორციელებულ ფრენაზე ატეხილი აჟიოტაჟი:
„თბილისსა და მინსკს შორის ამ თვეში პერიოდულად ხორციელდება ჩარტერული რეისები. თქვენი ტერმინით, ეს სპეციალური რეისია, მაგრამ ეს არის ჩვეულებრივი ჩარტერული რეისი. ამის შესახებ საგარეო საქმეთა სამინისტრომ განცხადება უკვე გააკეთა. ჩვენი ელჩი ბელორუსში თავის დანიშნულების ადგილზე ბრუნდებოდა, რაც სრულიად ბუნებრივია. საერთოდ არ მესმის ამ საკითხის ირგვლივ ატეხილი აჟიოტაჟი რა მიზანს ისახავდა“, – განაცხადა ნათია თურნავამ.
შეგახსენებთ, რომ ბელარუსის რესპუბლიკაში საქართველოს საგანგებო და სრულუფლებიანი ელჩი, ვალერი კვარაცხელია 6 აგვისტოდან იმყოფებოდა საქართველოში და ბოლო დღეებში ბელორუსში განვითარებული მოვლენების გამო მიზანშეწონილად ჩაითვალა მისი მყისიერი დაბრუნება მინსკში.
ავტორი
მარიკა ხორავა
