როგორც ცნობილია, თამარ ბაჩალიაშვილის საქმეზე გამოძიება თავისუფლების უკანონო აღკვეთის მუხლით მიმდინარეობდა, შემდეგ კი თვითმკვლელობამდე მიყვანის მუხლი დაემატა. ბაჩალიაშვილის ოჯახი და ადვოკატი გამოძიებას უნდობლობას უცხადებს.
გარდაცვლილი თამარ ბაჩალიაშვილის მამის განცხადებით, თვითმკვლელობის ვერსია მცდარია, არ სჯერა გამოძიების ვერსიის და მოითხოვს, რომ სიმართლე დადგინდეს:
“ეს თვითმკვლელობის თემა უნდა დავივიწყოთ, გამორიცხულია. ადამიანს, რომელსაც ოჯახში პრობლემა არ აქვს, ყველაფერი აქვს, არის სიცოცხლით სავსე და საზღვარგარეთ წასვლას აპირებს. ვეკითხებოდი, არაფერს არ იძახდა – თამუნა, რა მოგდის შვილო, ვიღაც ხომ არ გაშანტაჟებს, ან ხომ არ გაშინებს. ტიროდა და არაფერს არ მეუბნებოდა. ეტყობა შიშის ქვეშ იყო. სანამ არ გავიგებ, ალბათ აი იქ მოვკვდები,” – განაცხადა ჯუმბერ ბაჩალიაშვილმა.
საქმესთან დაკავშირებით, დღეს ოჯახის ადვოკატმა მიხეილ რამიშვილმა განაცხადა:
„მთელი ლეპტოპი არის აბსოლუტურად გაუბედურებული, წაშლილია ყველაფერი და ეს არის პირდაპირ მიმართება იმისკენ, რომ ამათ გადაწყვეტილი აქვთ, არანაირი საქმე არ გამოიძიონ და პირდაპირ ამყარებს იმ ინფორმაციას, აშკარად ხელს აფარებენ ამ ბავშვის მიერ იმ ინფორმაციის ფლობას და იმ მკვლელობას რაც მის მიმართ იყო გამოყენებული. მათ პირდაპირ აქვთ გადაწყვეტილება მიღებული, რომ გამოძიება არ ჩატარდეს და არანაირი ჯგუფი არ გამოვლინდეს ვინც მკვლელობა ჩაიდინა“.
თავისი პოზიცია დააფიქსირა თამარ ბაჩალიაშვილის დედამაც:
„სრული პასუხისმგებლობით ვაცხადებ, რომ შსს-ს მიერ იქნა მიგზავნილი ბაჩანა ლობჟანიძე, რათა გაეტყუებინა სახლიდან ჩემი შვილი. ასევე შინაგან საქმეთა სამინისტროში მე დავაყენე ბაჩანას ფსიქიკური პრობლემების საკითხი და მივიღე პირობა რომ გადაამოწმებენ,“ – აღნიშნავს თეონა თამაზაშვილი.
შსს თამარ ბაჩალიაშვილის საქმის გამოძიების მიმდინარეობასთან დაკავშირებით შუალედურ ინფორმაციას ავრცელებს. გამოქვეყნებული ინფორმაციით, ბაჩალიაშვილი საკუთარ კომპიუტერში გაუჩინარებამდე სუიციდის შესახებ ინფორმაციას ინტერნეტში ეძებდა.
ავტორი
თამუნა მახარაშვილი
