„სტრატეგია აღმაშენებლის“ ლიდერი გიორგი ვაშაძე აშშ-ის თავდაცვის აქტის შესწორებებს ეხმაურება და აღნიშნავს, რომ აშშ-ის კონგრესი მოითხოვს გამოძიებას კანონის უზენაესობისა და კორუფციის ფაქტებთან დაკავშირებით, რაც საფრთხეს უქმნის ჩვენი ქვეყნისადმი მხარდაჭერას და შესაძლოა სანქციების მიზეზი გახდეს. ოპოზიციონერი ლიდერის განმარტებით დამსხვრეული ოცნებების პარტიამ დაკარგა ჩვენი ყველაზე დიდი მხარდამჭერის ამერიკის შეერთებული შტატების ნდობა:
„აშშ-მა “დამსხვრეული ოცნებების” მთავრობას წითელი ბარათი აჩვენა.
მრავალი წლის განმავლობაში საქართველო ამაყობდა აშშ-სთან ახლო მოკავშირეობით – თუმცა დამსხვრეული ოცნებების პარტიამ დაკარგა ჩვენი ყველაზე დიდი მხარდამჭერის ნდობა. აშშ-ის კონგრესი მოითხოვს გამოძიებას კანონის უზენაესობისა და კორუფციის ფაქტებთან დაკავშირებით, რაც საფრთხეს უქმნის ჩვენი ქვეყნისადმი მხარდაჭერას და შესაძლოა სანქციების მიზეზი გახდეს.
საქართველოს დასავლური კურსი დიდ საფრთხეშია, ისევე როგორც უცხოური ინვესტიციები და ათი ათასობით სამუშაო ადგილი. ქვეყნის გაღარიბების შემდეგ, ამ მთავრობამ კიდევ ერთი ქართული ოცნება დაამსხვრია: დასავლური სამყაროს ღირსეული წევრობა. ჩვენ უნდა შევაჩეროთ ჩვენი ქვეყნის დაღმასვლა და ვაჩვენოთ აშშ-სა და ევროპას, რომ ჩვენ, მოქალაქეები მივიღებთ გადაწყვეტილებას მომავალზე, რომლითაც ვიამაყებთ და არ დავჯერდებით დამსხვრეულ ოცნებებს.
“დამსხვრეული ოცნებების” პარტია სერიოზულ საფრთხედ იქცა ეროვნული ინტერესებისთვის, ჩვენი ამოცანაა, რაც შეიძლება მალე და ქვეყნისთვის ნაკლები ზიანით ჩამოვაშოროთ ისინი ხელისუფლებას”, – განაცხადა გიორგი ვაშაძემ.
ავტორი
თამთა ასლანიშვილი
