საქართველოში ავიაკომპანიები რეგულარული რეისების ოპერირებით ბრუნდებიან – მარიამ ქვრივიშვილი

67

საქართველოს ტურიზმის ეროვნული ადმინისტრაციის ხელმძღვანელმა, მარიამ ქვრივიშვილმა საქართველოში საერთაშორისო ავიაკომპანიების რეგულარული რეისების განახლებაზე ისაუბრა და ხაზი საქართველოში ტურისტების ზრდად რაოდენობას გაუსვა, რომლებმაც ქვეყნის ტერიტორიაზე შემოსვლა, კარანტინის გარეშე მოახერხეს:

,,ქვეყნის საავიაციო და ტურიზმის ინდუსტრიაში ბრუნდებიან ჩვენი პარტნიორი საერთაშორისო ავიაკომპანიები რეგულარული რეისების ოპერირებით. გუშინ შესრულდა პარიზის რეისი. ბორტზე იმყოფებოდა 188 ადამიანი, საიდანაც აბსოლუტურ უმრავლესობას შეადგენდნენ ტურისტები, რომლებმაც ბუნებრივია კარანტინის გარეშე დატოვეს აეროპორტი და ახლა უკვე მოგზაურობენ ჩვენს ლამაზ ქვეყანაში. იგივე პრინციპი გავრცელდა მიუნხენის რეისზეც. მოგეხსენებათ, რომ საქართველოს 5 ქვეყანასთან ნაცვალგების პრინციპით აქვს გახსნილი ურთიერთმიმოსვლა. მიუნხენის რეისზეც ანალოგიურად ჭარბობდნენ ტურისტები და გერმანიის მოქალაქეები, ხოლო, რაც შეეხება პარიზის რეისს – საფრანგეთის მოქალაქეები. ჩვენ მოხარულები ვართ და გვინდა გაცნობოთ, რომ ამ რეისებს ჩამოყვნენ საქართველოს მოქალაქეები, რომელთაც აქვთ ორმაგი მოქალაქეობა ან გრძელვადიანი ბინადრობის უფლება, რის გამოც საქართველოში შემოვიდნენ კარანტინის გარეშე.

რაც შეეხება კარანტინის ნაწილს, მიმდინარეობს აღნიშნული პროექტი. ჩვენ 10 მარტიდან მივიღეთ დავალება, რომ საქართველოს ტურიზმის ეროვნულ ადმინისტრაციას უნდა განეხორციელებინა კარანტინის პროექტი და ამ დროის განმავლობაში ვუმასპინძლეთ 500000-ზე მეტ ადამიანს“, – განაცხადა მარიამ ქვრივიშვილმა.

ავტორი
ქეთა გაბრიაძე

კომენტარები