ლიბანში 3-დღიანი გლოვა და 2-კვირიანი საგანგებო მდგომარეობა გამოცხადდა

108

ლიბანის დედაქალაქ ბეირუთში გუშინ მომხდარ აფეთქებას არაოფიციალურად 78 ადამიანის სიცოცხლე ემსხვერპლა და 4000-ზე მეტი დაშავდა.

ბეირუთში მომხდარი აფეთქების გამო – ლიბანში დღეიდან 3 დღის განმავლობაში საყოველთაო გლოვაა გამოცხადებული. დედაქალაქში კი მასშტაბური აფეთქების შედეგებს ითვლიან. საავადმყოფოებში დაშავებულების მიღებას ვეღარ ახერხებენ.

ლიბანის დედაქალაქში აფეთქება საპორტო ნაწილში მოხდა, იქ სადაც ასაფეთქებელი ნივთიერებების საწყობია. დანგრეულია შენობები, ჩამსხვრეულია ფანჯრები და ჩამონგრეულია აივნები. ლიბანის პრეზიდენტმა ქვეყანაში ორკვირიანი საგანგებო მდგომარეობა გამოაცხადა. დაიწყო შეიარაღებული ძალების სრული შემადგენლობის მობილიზება. სამხედროებს უსაფრთხოების დაცვა და დაზარალებულ რაიონებში პატრულირება დაევალათ.

ჯერჯერობით უცნობია აფეთქების ზუსტი მიზეზი. არსებობს ვერსიაც, რომ აფეთქება, შესაძლოა, უბედური შემთხვევაც ყოფილიყო. ლიბანის შინაგან საქმეთა მინისტრმა გაავრცელა ცნობა, რომ ფეთქებად ნივთიერებას ხანძარი პორტის საწყობში გაუჩნდა.

ლიბანის დედაქალაქში აფეთქებას ეხმაურებიან მსოფლიო ლიდერები, ამერიკის შეერთებული შტატების პრეზიდენტი, დონალდ ტრამპი განცხადებას ავრცელებს და მწუხარებას გამოთქვამს ამ ტრაგედიის გამო. იგი ასევე ამბობს, რომ შესაძლოა ეს თავდასხმა ყოფილიყო.

მწუხარებას გამოვთქვამთ მომხდარის გამო და ლიბანელ ხალხს სამძიმრის წერილს ვუგზავნით. ვრცელდება ინფორმაცია, რომ ბევრი ადამიანია დაღუპული, კიდევ უფრო მეტი კი მძიმედ დაშავდა. მომხდარის შესახებ შეხვედრა მქონდა სამხედრო მაღალჩინოსნებთან და მითხრეს, რომ ეს საწარმოს აფეთქებას არ ჰგავს. ისინი მიიჩნევენ, რომ ეს საზარელი თავდასხმაა. აშშ მზად არის, ლიბანელ ხალხს დახმარება აღმოუჩინოს,” – აცხადებს დონალდ ტრამპი.

ბეირუთის ტრაგედიას ეხმაურება საქართველოს პრეზიდენტი სალომე ზურაბიშვილიც:

ჩემი ღრმა მწუხარება მინდა გამოთქვა ბეირუთში მომხდარ შემზარავ ამბავზე. მიუხედავად იმისა, რომ ეს ყველაფერი ახალია და არავინ არაფერი იცის, თუ რამდენი ზიანი მიადგა ქვეყანას და რა მოხდა , მე მწუხარებას გამოვთქვამ ამ ტრაგედიაზე.

ვლოცულობ მსხვეპლთათვის და მათი ოჯახებისთვის,” – ვკითხულობთ სალომე ზურაბიშვილის მიერ გავრცელებულ განცხადებაში.

ავტორი
მახო ზავრაშვილი

კომენტარები