ბოლო პერიოდში აქტუალური საკითხი, რომელმაც საზოგადოების ნაწილსა თუ პოლიტიკურ სუბიექტებს შორის განხილვები გამოიწვია – არის ოპოზიციონერი ლიდერის, გიორგი ვაშაძის გადაწყვეტილება, ცალკე პარტიად მიიღოს მონაწილეობა არჩევნებზე, ამ საკითხთან დაკავშირებით, სააგენტო „პარალელმა“ ექსპერტ თენგიზ ფხალაძესთან ისაუბრა.
ექსპერტი აღნიშნავს, რომ მიუხედავად ახალი პოლიტიკური გაერთიანებისა, „სტრატეგია აღმაშენებელს” და ვაშაძეს მზარდი პოლიტიკური რეიტინგი აქვს, გარდა ამისა, არსებობს ზეპარტიული ამოცანები, „სტრატეგია აღმაშენებელს“ კი აქვს იმის პოტენციალი, რომ ისაუბროს არა პარტიულ, არამედ ზეპარტიულ ამოცანებზე და თუ ამას მოახერხებს, ეს გაერთიანება სერიოზული გამოწვევა იქნება:
„გიორგი ვაშაძე დიდი ხანია ჩამოყალიბდა დამოუკიდებელ ლიდერად და იმ პოლიტიკოსად, რომელსაც მზარდი რეიტინგი აქვს და საერთოდ არ მიმაჩნია სიურპრიზად ან გასაკვირად, რომ მან გადაწყვიტა, თავისი ხაზით გაეგრძელებინა არჩევნებში მონაწილეობა, რაც ასევე მნიშვნელოვანია დღევანდელი პოლიტიკური სიტუაციისთვის იმიტომ, რომ დღეს, პოლიტიკოსების ერთ-ერთი უმთავრესი ამოცანა უნდა იყოს ის, რომ საზოგადოებას შესთავაზოს არა ორპოლუსიანი, არამედ მრავალფეროვანი პოლიტიკური სისტემა, რაც უზრუნველყოფს მათ გადაუწყვეტელი ამომრჩევლის მისვლას არჩევნებზე. ეს პოლიტიკური მრავალფეროვნება, შეიძლება ითქვას, ევროპული კულტურის ერთ-ერთი მნიშვნელოვანი ელემენტია და ამის შემოტანა ქართულ პოლიტიკურ სივრცეში ვფიქრობ, რომ ზოგადად პოლიტიკურ პროცესს გააჯანსაღებს.
გიორგი ვაშაძეს აქვს იმის პოტენციალი, რომ მან რაღაც ახალი შესთავაზოს ამომრჩეველს, რადგან მისი სახელი დაკავშირებულია რეფორმებთან, ინოვაციებთან და მას აქვს ის მიღწევები, რითიც შეუძლია, იამაყოს.
კონკურენცია იქნება რამდენიმე ფაქტორის გამო: პირველი ის, რომ „სტრატეგია აღმაშენებელი“ ერთგვარ ბრენდად ჩამოყალიბდა და ის ძალიან საინტერესო ხედვებს აერთიანებს სხვადასხვა მიმართულებით, რაც ვთვლი, რომ ამომრჩევლის ნაწილისთვის იქნება ძალიან საინტერესო. ამავდროულად, ჩვენ უკვე ვიხილეთ, გარკვეულად ახალი სახეებიც პოლიტიკაში, მაგალითად: სერგო ჩიხლაძე, თეონა აქუბარდია, და სხვები, რომლებიც თავიანთ სფეროში საკმაოდ მაღალი კვალიფიკაციის სპეციალისტები, სფეროს ექსპერტები არიან და თავისთავად ცხადია, რომ ასეთი სახეები პარტიის კონკურენტუნარიანობას სერიოზულად ზრდის.
ეს არის ახალი პოლიტიკური გაერთიანება. თავად ვაშაძემ გვაჩვენა, რომ როგორც პოლიტიკოსი, მას მზარდი პოლიტიკური რეიტინგი აქვს. ძალიან ახალგაზრდაა ეს გაერთიანება, ბევრი რამ კიდევ წინ არის. მომავალში, ალბათ, წარმოადგენენ კიდეც პოლიტიკურ პროგრამასაც. მათ აქვთ იმის პოტენციალი, მოიპოვონ საკმაოდ დიდი ნდობა, ინტერესი და მხარდაჭერა ამომრჩევლის, განსაკუთრებით იმ გადაუწყვეტელ ამომრჩევლის, რომელსაც ეს ორპოლუსიანი პარადიგმა არ მოსწონს და თავისთავად ცხადია, რომ კონკურენტუნარიანობა კიდევ გაიზრდება,“ – აღნიშნა ექსპერტმა.
რაც შეეხება აპირებს თუ არა თენგიზ ფხალაძე „სტრატეგია აღმაშენებლის“ გუნდში ჩართვას, ამასთან დაკავშირებით ექსპერტი აღნიშნავს, რომ ყოველთვის მზად არის ქვეყნისთვის, ეროვნული ინტერესებისთვის ითანამშრომლოს დამოუკიდებელ ექსპერტად, რადგან არსებობს ზეპარტიული ამოცანები, რომელიც პარტიულზე მაღლა დგას.
„მე დამოუკიდებელი ექსპერტი ვარ და დამოუკიდებელ ექსპერტად ვრჩები, თუმცა ნებისმიერ მნიშვნელოვან საკითხთან, რომელიც აქტუალურია ქვეყნისთვის, ეროვნული ინტერესებისთვის ყველამ უნდა ითანამშრომლოს, რადგან არსებობს ზეპარტიული ამოცანები. „სტრატეგია აღმაშენებელს“ აქვს იმის პოტენციალი, რომ მან ისაუბროს არა პარტიულ, არამედ ზეპარტიულ ამოცანებზე და თუ ამას მოახერხებს ეს გაერთიანება სერიოზული გამოწვევაა და მისი წონა კიდევ უფრო გაიზრდება“, – განაცხადა თენგიზ ფხალაძემ სააგენტო „პარალელთან” ინტერვიუში.
ავტორი
თამთა ასლანიშვილი