გარდაცვლილი თამარ ბაჩალიაშვილის დედამ შს სამინისტროში გამომძიებლებთან შეხვედრის წინ კომენტარი გააკეთა მისი შვილის საქმიანობასთან დაკავშირებით და განაცხადა, რომ თამარი ჯგუფური გადაწყვეტილებას მსხვერპლი გახდა:
“მქონდა ეჭვი, რომ იყო ერთ-ერთ ჩინოსანზე საუბარი, რომ მის ფაილებში შეაღწია ჩემმა შვილმა, მაგრამ ჯგუფური თუ იქნებოდა, ეს ვერ წარმომედგინა. 40 კილო კაფანდარა გოგოსთვის ეს ნამეტანია. ე.ი. სამი გველეშაპი გაერთიანდა, რომ მოეშორებინათ ერთი კაფანდარა გოგო. გაიტყუეს და ისე მოიშორეს. შეეძლოთ დაეშინებინათ და უბრალოდ ეცოცხლა ჩემ შვილს.
მე მინდა, რომ თამუნა გახდეს საქართველოში სამართლიანობის აღდგენის სიმბოლო და ამისთვის გავაკეთებ ყველაფერს, არ დავიხევ არცერთი წუთი უკან.
გახარიასთან მინდა შეხვედრა, პატივს თუ დამდებს და შემხვდება. ამ კაცმა თქვა, რომ ბაჩალიაშვილის და შაქარაშვილის საქმე უნდა იყოს გამოძიებული და რას მეტყვის, უშუალოდ მინდა მისგან გავიგო,” – განაცხადა თეონა თამაზაშვილმა, თამარ ბაჩალიაშვილის დედამ.
