პარტია „კანონი და სამართალის“ თავმჯომარე თაკო ჩარკვიანი გიორგი ვაშაძის შესახებ აღნიშნავს, რომ მსგავსი რეფორმატორი და პრაქტიკოსი პოლიტიკოსი არ უნახავს, რომელმაც უკვე დაანახა საზოგადოებას, წინა ხელისუფლების პერიოდში რა ტიპის რეფორმების გატარება შეუძლია. ჩარკვიანი ასევე იხსენებს 2018 წელს, როდესაც გიორგი ვაშაძეზე აღნიშნეს, რომ ის კარგი პრემიერი იქნებოდა:
„ჩვენი გაერთიანება ყოველგვარი დაგეგმვის გარეშე მოხდა. უბრალოდ ვიფიქრეთ, რა გვჭირდებოდა – ესაა ახალი, სახელმწიფოებრივად, ეკონომიკურად აშენებული ქვეყანა, რომელიც უბრალოდ არ გვაქვს, რადგან „ქართულმა ოცნებამ“ თავზე ჩამოგვამსხვრია.
მე დავინახე ახალგაზრდა ადამიანი, რომელსაც ორი წლის განმავლობაში ვაკვირდებოდი. რამდენჯერ გამარჯობა ვუთხარი, იმდენჯერ „პროექტიო“ – მიპასუხა. მივხვდი, რომ ეს ადამიანი არის მომართული იმისათვის, რომ რაღაც გააკეთოს.
საქართველოს სჭირდება ახალგაზრდა ადამიანი. მიზანმიმართულად, ამოჩემებით, ეს ქვეყანა ფეხზე რომ დააყენოს. მე არ მინახავს მსგავსი პრაქტიკოსი, რეფორმატორი რომელმაც უკვე გვაჩვენა, რა ტიპის რეფორმები გაატარა ყოფილი ხელისუფლების დროს.
ის ადამიანიც მინდა აღვნიშნო, რომელმაც მისცა მას საშუალება, რომ რეფორმები გაეკეთებინა, რადგან ამასაც დიდი ნიჭი სჭირდება. მე მიხარია, რომ 2018 წელსაც, ამ ადამიანმა თქვა, რომ გიორგი ვაშაძე, სავარაუდოდ, კარგი პრემიერი იქნებოდა. შემთხვევითი არაფერი არ ხდება. როდესაც ადამიანი გამოცდილი გყავს რეფორმებში, შენ მას თამამად ასახელებ.
ყველამ ერთად დაინახა, რომ არსებობს ადამიანი, რომელსაც უნდა ვენდოთ. მე მგონია, რომ მან, როგორც ახალგაზრდა ადამიანმა, ახალი სტილი თავად უნდა შემოიტანოს და წარსდგეს თქვენ წინაშე არა როგორც პრემიერი, არამედ – რეფორმატორი და საქართველოს აღმშენებლობის მოსურნე,“ – განაცხადა თაკო ჩარკვიანმა.
ავტორი
თამთა ასლანიშვილი
