ახალი საარჩევნო პლატფორმის „სტრატეგია აღმაშენებლის“ ბრენდის პრეზენტაციას და ბლოკთან დაკავშირებით ოპოზიციის მხრიდან გაკეთებულ განცხადებებს „ახალი საქართველოს“ გენერალური მდივანი პაატა მანჯგალაძე ეხმაურება და აღნიშნავს, რომ მისთვის გაუგებარია ოპოზიციონერი კოლეგების კომენტარები და რაღაც სულელურ შეთქმულების თეორიებზე საუბარი. მანჯგალაძე ასევე განმარტავს, რომ გიორგი ვაშაძის და სტრატეგია „აღმაშენებლის“ გუნდის ეს გადაწყვეტილება ნაკარნახევია ოპოზიციის საერთო გამარჯვების ინტერესებიდან გამომდინარე:
“დღეს მოხდა ახალი საარჩევნო პლატფორმის სტრატეგია „აღმაშენებლის“ ბრენდის პრეზენტაცია და საზოგადოებას შევთავაზეთ ძალიან მარტივი არჩევანი, ან „დამსხვრეული ოცნებების“ პარტია და ხელისუფლება, ან – აღმშენებლობა და დამარცხებული სიღარიბე.
კიდევ ერთხელ განვმარტავ, გიორგი ვაშაძისა და სტრატეგია „აღმაშენებლის“ გუნდის ეს გადაწყვეტილება ნაკარნახევია ოპოზიციის საერთო გამარჯვების ინტერესებიდან გამომდინარე და ოპოზიცია კი არ დაიშალა, არამედ ამ ახალი არჩევანით უფრო მრავალფეროვანი და ძლიერი გახდა. ჩემთვის გასაგებია ის კომენტარები, რაც „ქართული ოცნებისგან“ მოვისმინეთ, იმ პარტიის წარმომადგენლებისგან, რომელმაც საქართველოს მოსახლეობას დაუმსხვრია არა მხოლოდ ოცნებები, არამედ, იმედიც კი ჩაუქრო, რომ ეს სიღარიბე და მძიმე ყოფა ოდესმე დასრულდება.
ამასთან, ჩემთვის გაუგებარია ოპოზიციონერი კოლეგების კომენტარები და რაღაც სულელურ შეთქმულების თეორიებზე საუბარი. მსურს მარტივი რჩევა მივცე მათ, ვიდრე რაიმე განცხადებას გავაკეთებთ, დავფიქრდეთ, ვის ინტერესებში შედის ერთმანეთისთვის ტალახის სროლა და ოპოზიციას შორის დაპირისპირება და საერთო ოპოზიციური ფრონტის არარსებობა.
მეგობრებო, ხალხი ჩვენგან ელოდება ცვლილებებს და არა გაუთავებელ კინკლაობასა და ერთმანეთში მტყუან მართლის გარკვევას. მრავალფეროვნების ერთიანობით გავიმარჯვებთ”, – აცხადებს პაატა მანჯგალაძე.
ავტორი
თამთა ასლანიშვილი
