საქართველოს სტრატეგიული ანალიზის ცენტრის თანადამფუძნებელმა, თეონა აქუბარდიამ სააგენტო „პარალელთან“ ექსკლუზიურ ინტერვიუში გიორგი ვაშაძის ახალი პოლიტიკური გაერთიანება დადებითად შეაფასა და აღნიშნა, რომ “სტრატეგია აღმაშენებლის” ლიდერს აქვს კონკრეტული ხედვა და რესურსი იმისათვის, რომ ქვეყანაში პოზიტიური ცვლილებები განახორციელოს:
„მე ვფიქრობ, რომ გიორგი ვაშაძეს აქვს ძალიან საინტერესო წამოწყება, რასაც ჰქვია „სტრატეგია აღმაშენებელი“.
ამ პროცესში მას ჩართული ჰყავდა საკმაოდ კარგი ექსპერტები და მისი მიზანი, რომ არსებობდეს კონკრეტული ჩამოყალიბებული სტრატეგია ქვეყნის მძიმე ვითარებიდან გამოსაყვანად, ძალიან მნიშვნელოვანია, რადგან დღეს ვხედავთ, რომ ძირითადად, აქცენტი კეთდება იმაზე, თუ რა ცუდია ხელისუფლება, თუმცა არავინ არ საუბრობს იმაზე, როგორ უნდა გამოვიდეს ქვეყანა ამ მძიმე მდგომარეობიდან.
მნიშვნელოვანია ის, რომ მას აქვს კონკრეტული ხედვა და სტრატეგია მიზნის მისაღწევად. ამ ფორმატით არჩევნებში მონაწილეობა იქნება მნიშვნელოვანი შენაძენი, რომ ქვეყანამ რეალურად დააღწიოს თავი არსებულ ვითარებას და ცვლილებები უკეთესობისკენ არჩევნების გზით მივიღოთ.
გიორგი ვაშაძეს აქვს ჩამოყალიბებული ხედვა და ის ცდილობს, რომ მეტი ადამიანი და პოლიტიკური პარტნიორი გააერთიანოს ქვეყანაში პოზიტიური ცვლილებების განსახორციელებლად.
რაც შეეხება გაერთიანებული ოპოზიციასთან ურთიერთობას, ჩვენ ვხედავთ რომ მაჟორიტარულ კანდიდატებში ოპოზიცია ერთიანობას ინარჩუნებს, რაც ძალიან მნიშვნელოვანია, რათა ხელისუფლება შეიცვალოს.
გიორგი ვაშაძე არის ცნობილი სახე. მის სახელს უკავშირდება ის პროგრესი, რომელიც ქვეყანას ჰქონდა იუსტიციის სახლთან დაკავშირებით. მას აქვს ახალგაზრდული ენერგია, შესაბამისად, ვფიქრობ, რომ ის ქართულ პოლიტიკაში მნიშვნელოვან სიტყვას იტყვის,“ – განაცხადა სააგენტო „პარალელთან“ საუბრისას თეონა აქუბარდიამ.
ავტორი
ეკა ქაჩლიშვილი
