საქართველო კორონავირუსის გავრცელების ახალ ეტაპზეა? – ეპიდემიოლოგების შეფასებები დაავადებათა შემთხვევების მატების შემდეგ

21 ივლისის მონაცემებით საქართველოში კორონავირუსის 1073 შემთხვევაა დადასტურებული. ბოლო დღე-ღამის განმავლობაში ინფიცირების 24 ახალი შემთხვევა გამოვლინდა, რაც ბოლო თვე ნახევრის განმავლობაში ყველაზე მაღალი მაჩვენებელია.

ინფექციური საავადმყოფოს სამედიცინო დირექტორის მარინა ეზუგბაიას თქმით, ახალი შემთხვევებიდან 5 არის იმპორტირებული შემთხვევა, სატვირთო ავტომანქანების მძღოლები, 5 შემთხვევა არის ადგილობრივ ინფიცირებულთა კონტაქტები, 10 პაციენტს ვირუსი დაუდგინდა გარდაბანში ჩატარებული ტესტირებების შედეგად, 2 შემთხვევის წყარო კი ჯერჯერობით უცნობია და მიმდინარეობს კვლევა:

„ჩვენ ეხლა ე.წ. გარდაბნის რაიონის კლასტერი გვაქვს, საკმაოდ დიდი 4 სოფელია. მათში მცხოვრებთა რაოდენობა, როგორც ბატონმა ამირანმა მოგახსენათ, 7 000-ზე მეტი მოსახლეა. აქედან გამომდინარე, ეს მატება შემთხვევების ალბათ მოსალოდნელი იყო იმიტომ, რომ გაჩნდა ახალი წყარო კოვიდ-19-თან მიმართებაში. ამ მუნიციპალიტეტის კვლევა გაგრძელდება და თუ დაწესებულ რეგულაციებს მოსახლეობა შეასრულებს, მე, თქვენ და ყველანი, არა მგონია, რომ გასცილდეს ამ ახალ კლასტერს“, – აღნიშნა მარინა ეზუგბაიამ.

შემთხვევების მნიშვნელოვანმა მატებამ ეპიდემიოლოგების შეშფოთება გამოიწვია. დაავადებათა კონტროლის ეროვნული ცენტრის ხელმძღვანელის, ამირან გამყრელიძის განმარტებით, ყველაფერი დამოკიდებულია მოსახლეობის პასუხისმგებლობაზე. მან ასევე აღნიშნა, რომ 21 ივლისს ტესტირებისთვის რეგიონში ჩასულმა 6-მა ბრიგადამ მხოლოდ 350 ნიმუშის აღება შეძლო მაშინ, როდესაც 6 ბრიგადის საშუალო სიმძლავრე 700-1000 ტესტია:

„არ გამოვრიცხავ რადიკალური ღონისძიების გატარებას, თუ დამყოლობა არ იქნა სოფლის მოსახლეობის მხრიდან, არ მოგვეცემა საშუალება, რომ გამოვიკვლიოთ, ფართომასშტაბიანი კვლევები ვაწარმოოთ ამ დასახლებაში. მაშინ ერთადერთი ნაბიჯი, რა თქმა უნდა, არის სოფლების, ამ სამი სოფლის იზოლირება, ჩაკეტვა. ამაზე იმსჯელებს საკოორდინაციო საბჭო და მიიღებს შესაბამის გადაწყვეტილებას. მანამდე ვთხოვთ კიდევ ერთხელ მოსახლეობას, რომ იყოს მეტი დამყოლობა“, – განაცხადა ამირან გამყრელიძემ.

შეგახსენებთ, გუშინ სააკორდინაციო საბჭომ იმსჯელა მარნეულის 3 სოფლის ჩაკეტვაზე, თუმცა ეს გადაწყვეტილება არ მიიღეს და მხოლოდ ბაზრობებზე და ბაზრებში კონტროლი გაამკაცრეს.

ასევე, დღეის მონაცემებით საქართველოში ვირუსით ინფიცირების – 1073 შემთხვევა დადასტურდა.

გამოჯანმრთელდა – 907

გარდაიცვალა – 16 პაციენტი

კარანტინის რეჟიმშია – 5724 ადამიანი

სტაციონარში მეთვალყურეობის ქვეშაა – 247

უცხოეთიდან სამკურნალოდ გადმოყვანილი საქართველოს მოქალაქეების რაოდენობაა – 41

ავტორი
მახო ზავრაშვილი