რა საჭიროა ახლა ეს რიჟა ბაზარი, პირდაპირ თქვით, რომ მარიანა ჩოლოიანი გყავთ ციხიდან გამოსაყვანი – ვახო სანაია

ტელეკომპანია “ფორმულას” ჟურნალისტი, ვახო სანაია ახალქალაქისა და კუმურდოს ეპარქიის მიტროპოლიტის მეუფე ნიკოლოზის განცხადებას ეხმიანება და მიაჩნია, რომ განცხადების მიზანი ლუკა სირაძის თვითმკვლელობამდე მიყვანისთვის ბრალდებული მარიანა ჩოლოიანის ციხიდან გამოყვანისთვის ფონის შექმნაა:

“რა საჭიროა ახლა ეს რიჟა ბაზარი. პირდაპირ თქვით, რომ მარიანა ჩოლოიანი გყავთ ციხიდან გამოსაყვანი და სხვები გადასარჩენი, ვისაც შეიძლება, პასუხისმგებლობა დაეკისროს ლუკა სირაძის გამო.

მოკლედ, თუ გინდათ, ბავშვი იქ ცხონდეს, თქვით, რომ ლუკა სირაძის სიკვდილი შემთხვევითობაა და დაკავებული გამოუშვითო.

თუ იტყვით, რომ თვითმკვლელობა იყო და ამის გამო ვიღაცები აქ დაისჯებიან, მაშინ ის ბავშვი იქ ვერ ცხონდება, რადგან ჩვენ ლოცვას შევწყვეტთო, ესაა შინაარსი,” – წერს ფეისბუკის პირად გვერდზე ვახო სანაია.

ვახო სანაია ამავე პოსტში აქვეყნებს მეუფე ნიკოლოზის პოზიციას:

„ოჯახის წევრებმა ეკლესიას მომართეს. რა თქმა უნდა, იყო მსჯელობა, განხილვა ამ საკითხის, შეიძლებოდა თუ არა ლუკა სირაძისთვის წესის აგება. თუ ეს ნამდვილად მტკიცდება, რომ თვითმკვლელობაა, მაშინ წესის აგება არ შეიძლება. ეს არის საეკლესიო წესი. არ შეიძლება იმიტომ, რომ თვითონ ლუკასთვის ეს იქნებოდა ცუდი. ჩვენ დავრწმუნდით მაშინ, ოჯახის წევრებმა დიდი როლი შეასრულეს, მაგრამ გარდა ოჯახის წევრებისა, ჩვენ კარგად გავერკვიეთ სიტუაციაში და დავრწმუნდით, რომ ნამდვილად არ არის გამორიცხული, რომ ეს იყო შემთხვევითობა. ამ შემთხვევაში, ჩვენ შეგვიძლია, რომ ვილოცოთ მისთვის, შეგვიძლია, რომ წესი ავუგოთ, გავაგრძელოთ ლოცვა. ამ განცხადების გაკეთება გახდა საჭირო იმიტომ, რომ ახლა განახლდა საუბარი და ამ განახლებულ საუბარში აბსოლუტურად დარწმუნებით არის საუბარი, რომ ეს იყო თვითმკვლელობა. თუ ამ 7 თვის განმავლობაში გამოჩნდა რაიმე ახალი გარემოებები, რაც ჩვენ არ ვიცით, თუ აღმოჩნდა, რომ ნამდვილად თვითმკვლელობაა, მაშინ თხოვნა მაქვს ყველასთვის, რომ გაგვაგებინეთ, ჩვენც უნდა ვიცოდეთ. პირველ რიგში, რაც მე მალაპარაკებს და მამოძრავებს ეს ლუკა სირაძის სულის ბედია, ასევე იმ ადამიანების, ვინც ამ საქმეში არიან ჩართულები. ჩვენ გარკვეული „ინსტრუქციების“ მიხედვით ვმოქმედებთ, გვაქვს გაწერილი ეს ყველაფერი და ვიცით, რა შემთხვევაში, როგორ უნდა მოვიქცეთ. ჩვენ მოვიქეცით ასე და წესი ავუგეთ, მაგრამ თუ დღეს ვინმე დაგვარწმუნებს, რომ ეს ნამდვილად იყო თვითმკვლელობა, მაშინ დღეიდან ჩვენ სხვანაირად უნდა მოვიქცეთ. ჩვენ არ გვაქვს მისთვის ლოცვის უფლება. თვითმკვლელისთვის არ შეიძლება არანაირი ლოცვა. ჩვენ ძალიან დიდი იმედი გვაქვს, რომ ეს ასე არ არის“.