მთავრობის სხდომის დასრულების შემდეგ, საქართველოს საგარეო საქმეთა მინისტრმა დავით ზალკალიანმა ფრენებთან დაკავშირებით ისაუბრა და აღნიშნა, რომ მიმდინარეობს მოლაპარაკებები ევროკავშირის სხვა წევრ ქვეყნებთან და რეგულარულად საქართველო სხვა ქვეყნებთანაც გახსნის საზღვრებს.
“ჩვენ თანმიმდევრულად განვაახლებთ ევროკავშირის სხვა წევრ ქვეყნებთან ფრენებს, მათთან მოლაპარაკებები უკვე დაწყებულია. ის სია, რომელიც ახლა გვაქვს არ არის საბოლოო. ევროკავშირის გადაწყვეტილება აძლევს შესაძლებლობას ევროკავშირის წევრ ქვეყნებს, რომ ორ კვირაში ერთხელ გადასინჯონ არსებული სია და ეპიდემიოლოგიური სიტუაციიდან გამიომდინარე მიიღონ შესაბამისი გადაწყვეტილება.
ჩვენი ქმედებაც იქნება თანმიმდევრული, ჩვენს სპეციალისტებთან მჭიდრო კოორდინაციისა და კონსულტაციების შედეგად იმ ფაქტებზე დაყრდნობით რა სიტუაციაც იქნება შექმნილი ევროკავშირის ქვეყნებში, მივიღებთ შესაბამის გადაწყვეტილებას და არ არის გამორიცხული, რომ გარკვეული პერიოდის შემდეგ ეს სია გაფართოვდეს,” – განაცხადა დავით ზალკალიანმა
შეგახსნებთ, რომ 30 ივნისს ევროკავშირმა საქართველო იმ 15 უსაფრთო ქვეყანათა სიაში შეიყვანა, სადაც ეპიდემიოლოგიური სიტუაცია კონტროლირებადი და მშვიდია.
ავტორი
მახო ზავრაშვილი