პარტია „ახალი საქართველოს“ თავმჯდომარე გიორგი ვაშაძე აცხადებს, რომ საქართველოში ეკონომიკის თვალსაზრისით მძიმე მდგომარეობაა, ფაქტობრივად აღარ არსებობს მცირე და საშუალო ბიზნესი, ერთადერთი იმედი კი, რომელიც ხალხს ჰქონდა, ეს საზღვრების გახსნა და ტურისტების ნაკადის შემოსვლა იყო. ოპოზიციონერი ლიდერი პრემიერ-მინისტრს დანაპირების შესრულებისა და რეალური საქმის კეთებისაკენ მოუწოდებს:
”საქართველოში ახლა უმძიმესი ვითარებაა. ხელისუფლების არასწორი ნაბიჯების გამო, მცირე და საშუალო ბიზნესი აღარ არსებობს. ჩვენ ეკონომიკურად ფაქტობრივად გაკოტრებულები ვართ. ერთადერთი იმედი, რომელიც ხალხს ჰქონდა, ეს 1 ივლისს საზღვრების გახსნა და ქვეყანაში ტურისტების შემოსვლა იყო. ეს იმედიც, პირადად გახარიამ და მთავრობამ, გაუცრუა ხალხს. დახურულია თითქმის ყველა ტურისტული ობიექტი, მაღაზიები თუ სასტუმროები.
მივმართავ გახარიას, მაისის დასაწყისში წარმოგიდგინეთ გეგმა, დეტალურად გაწერილი ალგორითმი ეპიდუსაფრთხოებასთან დაკავშირებით, როგორ უნდა გაგეხსნათ 1 ივნისს სახმელეთო, ხოლო 15 ივნისს საჰაერო საზღვრები, მაგრამ თქვენ კიდევ ერთხელ მოგვატყუეთ. გაგვაგებინეთ რა გინდათ? ბატონო გახარია, ამ ფუქსავატობას, რომელსაც თქვენ ეწევით ხომ არ უნდა შეეწიროს ქართველი ადამიანი და მშიერი ამოვწყდეთ ამ ქვეყანაში?! წარმოუდგენელი ვითარებაა…
ერთი, რომ საზღვრები დაკეტილია და ტურისტი არ შემოდის, ხოლო მეორე – ბანკები, რომლებიც ახრჩობენ ადამიანებს და გაზრდილ პროცენტებს სთავაზობენ გადავადების სანაცვლოდ. რისთვის გვჭირდება საერთოდ ხელისუფლება და მთავრობა?!
ფუქსავატო გახარია, შენ რისთვის არსებობ თუ ადამიანებს არ ეხმარები და ნორმალურ გადაწყვეტილებას არ იღებ?! ევროკავშირმა შეგვიყვანა „მწვანე ქვეყნების“ სიაში. დღეს ჩვენ შეგვეძლო, რომ მიგვეღო ყველაზე მაღალშემოსავლიანი ტურისტები ქვეყანაში და ევროპისთვის გაგვეხსნა საზღვრები იმიტომ, რომ სხვა ქვეყნებში ვერ წავიდოდნენ, მაგრამ ამის სანაცვლოდ ჩაგვკეტეთ და გსურთ, რომ პირდაპირ ამოგვახრჩოთ შიმშილში.
მე პირდაპირ გეუბნებით, რომ ეს არ შეგრჩებათ! თქვენი არასწორი გადაწყვეტილებები უკვე მინიმუმ 2 მილიარდი ლარი დაგვიჯდა. ჩვენ გამოგიგზავნეთ გეგმა, მაგრამ რაღაც გაუგებარი პოლიტიკური მიზნების გამო არ ხსნით საზღვრებს.
კიდევ ერთხელ მოგმართავთ, – ფუქსავატო გახარია, დაანებე ტელევიზიებით პრანჭვას თავი, გაუგებარი, ერთი და იგივე სიტყვების რახარუხს და რეალური საქმე აკეთე!’’ – აცხადებს გიორგი ვაშაძე.
