ეროვნულ გამოცდებზე აბიტურიენტებს პირბადის მოხსნის შესაძლებლობა ექნებათ, ამის შესახებ საქართველოს პრემიერ-მინისტრმა გიორგი გახარიამ მთავრობის სხდომაზე განაცხადა. მისივე თქმით, თუ ოთახში ტემპერატურა 30 გრადუსს გადააჭარბებს, შესაძლებელი იქნება კონდიციონერის ჩართვა. აბიტურიენტებს ექნებათ სრულად კომფორტული გარემო იმისთვის, რომ ჩააბარონ გამოცდები და შემდგომ სწავლა უმაღლეს სასწავლებლებში გააგრძელონ:
„ეროვნული გამოცდები იწყება 6 ივლისიდან და გრძელდება 25 ივლისამდე. ეს ის საკითხია, რომელიც ადარდებს აბიტურიენტებს და მათ მშობლებს. დღეს, ჩვენ გვქონდა თათბირი ჯანდაცვის სექტორის წარმომადგენლებთან და ეპიდემიოლოგებთან.
გადაწყვეტილებები, რომლებიც დღეს შეგვიძლია რომ განვაცხადოთ და რომელზეც შემდგომ უნდა ვიმსჯელოთ, გახლავთ შემდეგი – იქიდან გამომდინარე, რომ განათლების სამინისტრო ტექნიკურად საკმაოდ კარგად მოემზადა ამ გამოცდების ჩასატარებლად, აბიტურიენტს, რომელიც აუცილებლად პირბადით უნდა მივიდეს თავის საგამოცდო ადგილზე, დაჯდეს მერხთან, რომელიც უზრუნველყოფილი იქნება დეზობარიერით, გამოცდის ჩაბარების პერიოდში ექნება შესაძლებლობა, რომ პირბადე მოიხსნას, რადგან იქ დისტანცია იქნება დაცული. ასევე, ფანჯრები ყველგან უნდა იყოს ღია, მაგრამ იმ შემთხვევაში, თუ საგამოცდო ოთახში ტემპერატურა მიაღწევს 30 გრადუსს, შესაძლებელი იქნება კონდიციონერების ჩართვა.
ეს რეკომენდაციები ჩვენ ასევე მიღებული გვაქვს ჯანდაცვის მსოფლიო ორგანიზაციისგან. ფაქტობრივად, ჩვენ სრულად კომფორტულ გარემოს შევუქმნით, შეძლებისდაგვარად, ჩვენს აბიტურიენტებს იმისათვის, რომ მაქსიმალურად გამოავლინონ თავიანთი ცოდნა, ეფექტურად და წარმატებით ჩააბარონ გამოცდები, შემდგომ გააგრძელონ განათლების მიღება უმაღლეს სასწავლებლებში,“- განაცხადა გიორგი გახარიამ.
ავტორი
ქეთა გაბრიაძე
