პარლამენტის სხდომაზე, სადაც საქართველოს პრემიერ-მინისტრმა გიორგი გახარიამ წლიური ანგარიში წარადგინა, ,,ევროპული საქართველოს” ერთ-ერთმა ლიდერმა, ელენე ხოშტარიამ სუს-ის მიერ ჟურნალისტებისა და პოლიტიკოსების დაბარებასა და დაკითხვებზე ისაუბრა. როგორც თავად ამბობს მას ,,ფეხებზე ჰკიდია” სუს-იც და ბიძინა ივანიშვილიც.
ელენე ხოშტარიამ, საქართველოს პრემიერს 20 ივნისის მოვლენებიც შეახსენა და კითხვა დაუსვა იმის შესახებ, თუ რად უღირს ამ დღის მოვლენების შემდეგ კვლავ პარლამენტში დარჩენა:
„ჩემი კოლეგებისგან განსხვავებით, მე ნამდვილად არ გამკვირვებია, რომ თქვენ დღეს 20 ივნისი არ ახსენეთ. მას შემდეგ რაც დადეთ პირობა, რომ სრულად გამოძიებდით რა მოხდა და მერე წახვიდოდით, ამის საპირისპიროდ, პრემიერ-მინისტრის სკამს კარგად ირგებთ. მას შემდეგ, რაც „ტროლების ქარხანამ“ და „ფეიქ ნიუსებს“ რომ იძახით ზუსტად მან, დიდი იერიში მიიტანა დაზარალებულებზე და კონკრეტულად მაკო გომურზე.
მას შემდეგ რაც არცერთი პოლიციელი არ დასჯილა ამდენი ხნის განმავლობაში, მას შემდეგ რაც ლავროვის მოთხოვნით პირიქით გავრილოვის პატიმრები გყავთ და ერთი მათგანი გიორგი რურუა კვლავ ციხეშია. როგორც ქალბატონი მაია ახლაც იღიმება ამ სისხლიან კადრებზე, ცინიკური ღიმილით პასუხობს და როგორც ამბობთ, თქვენთვის მეორეხარისხოვანია დამიზნებით ისროდნენ თუ არაო, ნამდვილად არ გამკვირვებია.
ერთადერთი კითხვა მაქვს თქვენთან, – უბრალოდ რად გიღირთ ეს ყველაფერი 20 ივნისის შემდეგ?
კომიკურია თუ სატირალი არ ვიცი, მაგრამ დღეს ვუყურებთ სუს-ი როგორ ურეკავს ჟურნალისტებს, პოლიტიკოსებს და იბარებს. ერთადერთი რამე მინდა გთხოვოთ, გადაეცით მაგ თქვენ სუს-ს და ბიძინა ივანიშვილს, რომ ფეხებზე გვკიდია,” – აღნიშნა ელენე ხოშტარიამ.
ავტორი
ქეთა გაბრიაძე
