პოლიტიკური პლატფორმა “ახალი საქართველოს” თავმჯდომარემ, ლეიბორისტულ პარტიაში მაჟორიტარობის კანდიდატებზე შეთანხმების შემდეგ განაცხადა, რომ დღეს პოლიტიკურმა პარტიებმა, ცალკეულმა პიროვნებებმა, კიდევ ერთხელ უჩვენეს მართლაც ძალიან მაღალი პოლიტიკური კლასი და ეს დღე კიდევ ერთი გამარჯვების დღეა. გიორგი ვაშაძის თქმით 31 ოქტომბერის არჩევნების შემდეგ ქვეყანაში იქნება მმართველობა, რომელიც ადამიანების გაჭირვებასა და პრობლემებზე იქნება ორიენტირებული:
“დღეს ძალიან მნიშვნელოვანი დღეა, როცა ერთიანობის იდეამ გაიმარჯვა დაქსაქსულობაზე, როცა ეროვნული თანხმობის იდეა იმარჯვებს დაპირისპირებაზე, როცა აღმშენებლობის იდეა იმარჯვებს უბედურებაზე, რაც ქვეყანაში ხდება.
ვფიქრობ, რომ დღეს პოლიტიკურმა პარტიებმა ცალკეულმა პიროვნებებმა, კიდევ ერთხელ აჩვენეს მართლაც ძალიან მაღალი პოლიტიკური კლასი. ჩვენ ვაკეთებთ არა იმას, თუ რა უნდა ერთ კონკრეტულ პარტიას ან რომელიმე პოლიტიკურ ლიდერს, არამედ იმას, რაც უნდა ხალხს, ხალხი კი ჩვენგან ითხოვს შეთანხმებას და თანხმობას.
საქართველოს საოცარი განვითარების პერსპექტივა გააჩნია და საოცარი აღმშენებლობის პროცესი შეგვიძლია დავიწყოთ. ვფიქრობ, რომ დღევანდელი დღე, ეს არის ჩანასახი იმ სრულიად ახალი თაობის კოალიციური მმართველობისა, რომელიც 31 ოქტომბრის შემდეგ აუცილებლად იქნება ქვეყანაში, იმ მმართველობის, რომელიც იქნება ხალხის სამსახურში, ადამიანის გაჭირვებასა და პრობლემაზე ორიენტირებული.
ეს არჩევნები არის არჩევანი დასავლურ განვითარებასა და რუსულ ვექტორს შორის, ეს არჩევნები არის ძლიერ, ერთიან, თავისუფალ საქართველოსა და დაჩაჩანაკებულ/გაუბედურებულ საქართველოს შორის. მგონი დადგა დრო, რომ ყველამ ერთიანი ძალები მოვიკრიბოთ და ერთიანი ძალისხმევით წავიდეთ. არა პარტიები, არა ნომრები, არა კულუარული მოლაპარაკებები, არამედ საჯაროობა, ერთად ყოფნა და თანხვედრა.
დიდი მადლობა ყველა მხარდამჭერს, რომლებიც ცოტა ვანერვიულეთ ამ შეთანხმების მიღწევამდე. მაგრამ როგორც 8 მარტის შეთანხმება დიდი გამარჯვებით დავასრულეთ ჩვენი ამ ფორმატის ერთიანობითა და თანხვედრით, დღევანდელი დღეც, ასევე, ერთი დიდი გამარჯვებაა. საბოლოო გამარჯვებას ყველა ერთად 31 ოქტომბერს მივაღწევთ. ძალა ერთობაშია,” – განაცხადა გიორგი ვაშაძემ.
ინფორმაციისათვის, მაჟორიტარობის კანდიდატების გადანაწილება დედაქალაქის ოლქები შემდეგნაირად მოხდა: ვაკეში – ელენე ხოშტარია, მთაწმინდა-კრწანისის ოლქში – შალვა შავგულიძე, ისანში – გიორგი ვაშაძე, ნაძალადევში – შალვა ნათელაშვილი, ნიკანორ მელია – გლდანში, ლევან ხაბეიშვილი – სამგორში. ჯერ არაა გადაწყვეტილება მიღებული საბურთალოსა და დიდუბე-ჩუღურეთის ოლქებში მაჟორიტარობის კანდიდატებთან დაკავშირებით.
ავტორი
თამთა ასლანიშვილი