ტელეკომპანია “მთავარი არხის” გენერალური დირექტორის მოადგილე, გიორგი გაბუნია სასამართლოში მივიდა, სადაც მის შესაძლო ლიკვიდაციასთან დაკავშირებით დაწყებული გამოძიების ფარგლებში გამოიკითხა. მაგისტრი მოსამართლის თანდასწრებით დაკითხვა ჟურნალისტმა თავად მოითხოვა, მას შემდეგ, რაც სახელმწიფო უსაფრთხოების სამსახურში მოწმის სახით გამოკითხვაზე დაიბარეს:
„მთავარი აქცენტი იყო იმაზე თუ საიდან მაქვს ინფორმაცია. აქამდეც ვთქვი და ახლაც გავიმეორებ, რომ ინფორმაციის ორი წყარო მყავდა: ეს იყო ნიკა გვარამია, რომელმაც გამაფრთხილა, რომ შესაძლო იყო ადგილი ჰქონოდა ჩემი სიცოცხლის ხელყოფას, ხოლო მეორე წყარო ჩემი პირადი დაცვაა.
მოსამართლეს ასევე აინტერესებდა – მქონდა თუ არა მცდელობა მიმემართა სამართალდამცავი ორგანოებისთვის, ამ ინფორმაციის გაგების შემდეგ. ჩემი პასუხი იყო – არა. იმიტომ, რომ პირველ რიგში, ვენდობი ნიკა გვარამიას, რომელიც მაწვდის ასეთ ინფორმაციას და თან მისგანვე ვიგებ, რომ წყარო იყო “სუს”-ი. ამ ფონზე აზრს კარგავს ისევ “სუს”-ში წასვლა და ამის თაობაზე საუბარი.
ინფორმაციის მეორე წყარო არის ჩემი დაცვა, რომელიც განსაკუთრებით გააძლიერა ტელეკომპანიამ ბოლო რამდენიმე თვის განმავლობაში. დიდი ალბათობით ჩემს დაცვასაც დაიბარებენ დაკითხვაზე.
ასევე მკითხეს, – ვიცოდი თუ არა, რა მიმართულებაზე მუშაობდა გამოძიება. ეს, რა თქმა უნდა, არ ვიცი. მათი კითხვები შეეხებოდა იმას, თუ რა ინფორმაცია მაქვს და ხომ არ ვიცოდი რამე კონკრეტული,“ – განაცხადა გიორგი გაბუნიამ.
ცნობისთვის, მაგისტრი მოსამართლის თანდასწრებით დღეს ასევე გამოიკითხება ტელეკომპანია “მთავარის” გენერალური დირექტორი ნიკა გვარამია. მისი განცხადებით, კონტრტერორისტული სამსახურის მიერ ქავთარაძის ქუჩაზე, რამდენიმე დღის წინ დაკავებული რუსეთის მოქალაქე, ეროვნებით ინგუში ვასამბეგ ბადრის ძე ბოკოვი, ჟურნალისტ გიორგი გაბუნიას ლიკვიდაციას გეგმავდა. ნიკა გვარამია აღნიშნავს, რომ გიორგი გაბუნიას ლიკვიდაცია ჩეჩნეთის ლიდერის, რამზან კადიროვის დაკვეთით იგეგმებოდა, რისი მიზეზიც ჟურნალისტის მიერ პუტინის მისამართით, ჯერ კიდევ “რუსთავი2”-ზე მუშაობისას, მის გადაცემაში გაკეთებული განცხადება იყო.
ჟურნალისტის შესაძლო ლიკვიდაციასთან დაკავშირებით ინფორმაცია ტელეკომპანია “ფორმულამ” რამდენიმე დღის წინ გაავრცელა.
ავტორი
მახო ზავრაშვილი
