კადიროვის განცხადებას ეხმაურება პოლიტიკური პლატფორმა “ახალი საქართველოს” თავმჯდომარე გიორგი ვაშაძე და აცხადებს, რომ დანაშაულებრივია იმის თქმა, რომ პროვოკაციაა ეს ყველაფერი, როდესაც ტერორისტული აქტი იგეგმებოდა. გაერთიანებული ოპოზიციის ერთ-ერთი ლიდერი აღნიშნავს, რომ აუცილებელია საერთაშორისო პარტნიორებისთვის ყველა მნიშვნელოვანი ინფორმაციის მიწოდება, რადგან დასავლეთს მსგავს საკითხებზე აქვს დიდი გამოცდილება.
“კადიროვის გუშინდელი განცხადება მუქარის შემცველია გიორგი გაბუნიასთან და ზოგადად საქართველოს სახელმწიფოსთან მიმართებაში. საგარეო საქმეთა სამინისტრო ამ წყალ-წყალა განცხადებებს კი არ უნდა აკეთებდეს, ახლა საერთაშორისო ასპარეზზე უნდა იყოს ჰიპერაქტიური საკითხი, რომ, ჩვენ, მეგობარი ქვეყნები ჩავაყენოთ საქმის კურსში.
რადგანაც დასავლეთს აქვს გამოცდილება მსგავს შემთხვევებში, მაგალითად სკრიპალების საქმე და სხვა ასეთი ტიპის საქმეები, ამიტომ დაუყოვნებლივ უნდა მოხდეს, საერთაშორისო მექანიზმების ჩართვა, რომ ავირიდოთ თავიდან ის აგრესიული ქმედება, რომელსაც ადგილი აქვს რუსეთის ფედერაციის მხრიდან და მისი ოფიციალური წარმომადგენლის ბატონი კადიროვის მხრიდან. კიდევ ერთხელ ვამბობ არ შეიძლება ამ თემის ჩაკეტვა ქვეყანაში.
დანაშაულებრივია განცხადება, როდესაც საუბრობენ, რომ ვინმე პროვოკაციას გეგმავდა. მაგალითად, პრეზიდენტის განცხადება აბსურდია, იგივე უმრავლესობის ერთ-ერთი ლიდერი საუბრობს პროვოკაციაზე. რა პროვოკაცია, – ტერაქტი იგეგმებოდა ქვეყანაში!
ეს არის პროვოკაცია?! – ეს არის ტერორისტული აქტი და გახარია, რომელიც ემალება ამ საკითხს. მე მშიშარა პრემიერ-მინისტრი არაფერში მჭირდება, გამოდი თუ ვაჟკაცი ხარ, აიღე პასუხისმგებლობა შენს თავზე და ისაუბრე ამ საკითხებზე. ნუ ემალებიან ამ პროცესს და მთავარია, რომ მოხდეს საერთაშორისო ასპარეზზე ამის გატანა.
ნატოში ამერიკის ელჩმა უკვე გააკეთა განცხადება ამ საკითხთან დაკავშირებით და ძალიან მნიშვნელოვანია, რომ ყველა სხვა საერთაშორისო მექანიზმი იყოს ამოქმედებული,” – აცხადებს გიორგი ვაშაძე.
ავტორი
თამთა ასლანიშვილი
