ძიძიგურისა და მინდელის შახტებში დასაქმებულები მეორე დღეა, რაც პროტესტის ნიშნად მუშაობაზე უარს აცხადებენ და ადმინისტრაციის შენობასთან იკრიბებიან. მეშახტეების თქმით, მათი უსაფრთხოება დაცული არ არის, რასაც ბოლოს მომხდარი ინციდენტიც ადასტურებს. ისინი, ასევე, დამსაქმებელ კომპანიას კორონავირუსული პანდემიის გამო სახელმწიფო ბიუჯეტიდან დაბრუნებული 20%-ის დარიცხვისკენაც მოუწოდებენ:
“გამოცდილები რომ არ ვყოფილიყავით, 22 კაცის მსხვერპლი შეიძლებოდა გვქონოდა. ლიფტი, რომლითაც შახტში ჩავდივართ და ამოვდივართ, ჯერ გაიჭედა, მერე დიდი სიჩქარით ძირს დაეცა. სახურავიდან ამოვედით, სიკვდილს თვალებში ჩავხედეთ. ვითხოვთ ამ ლიფტის შეკეთებას და დასკვნას, რომ ის უსაფრთხოა. ჩამოვიდეს აქ ეკონომიკის მინისტრი,” – ამბობს მეშახტე გაგა ისაკაძე.
დასაქმებულებმა დღეს დამსაქმებელთან მოლაპარაკება სცადეს, თუმცა მოლაპარაკება უშედეგოდ დასრულდა. უსაფრთხოების ზომების გამკაცრებამდე და ხელფასების მატებამდე კი მეშახტეები მუშაობის გაგრძელებას არ აპირებენ.
თავის მხრივ, კომპანია საქნახშირის გენერალური დირექტორი მომხდარზე სრულ პასუხისმგებლობას მეშახტეებს აკისრებს:
„დასაქმებულებმა შახტიდან ამოსვლა 2 საათით ადრე გადაწყვიტეს და არავინ გააფრთხილეს, იმ დროს კი ე.წ. დამხმარე ჭაური გადართული იყო ტვირთის გადაზიდვის რეჟიმზე. საწარმოში სრული რეკონსტრუქცია მიმდინარეობს შახტებში ტექნიკური გადაიარაღების თვალსაზრისით. შახტში არსებულ ვითარებას კი ტექნიკური ზედამხედველობის სპეციალური ჯგუფი შეისწავლის,“ – განაცხადა მიხაილ სოცკიმ.
შეგახსენებთ, ინციდენტი 2 დღის წინ, ღამით, დაახლოებით 00:40 წუთზე, იმ დროს მოხდა, როდესაც მეშახტეები შახტიდან ამოდიოდნენ.
ლიკა დევდარიანი
სააგენტო “პარალელის”
რეგიონალური კორესპონდენტი
