პოლიტიკური ფილოსოფიის დოქტორი, ანალიტიკოსი არჩილ გამზარდია თავის პოზიციას აფიქსირებს და კონკრეტულ განმარტებებს აკეთებს ეკლესიასთან მიმართებით:
“ჩვენი ეპისკოპატის ძირითადი ნაწილი ეკლესიას აღიქვამს იერარქიულ საკუთრებად, საკუთარ თავს კი კორპორატიულ დირექტორებად, რომელთაც ყველაფრის უფლება გააჩნიათ.
საეკლესიო იერარქები მრევლს აღიქვამს პატრონ-ყმურ რეჟიმში, ისევე, როგორც ჩვენი საერო ხელისუფალნი, ამოსავალი საეკლესიო ძალაუფალთათვის არა იმდენად საღვთო სათნოებებია, არამედ საკუთარი ნება, სადაც საღვთო სჯულს არსებითად დევნის და ჩაგვრის ინსტრუმენტად უფრო იყენებენ, ვიდრე ქრისტიანული აღზრდის ფილოსოფიის კონცეფციად.
პრაქტიკულად არ არსებობს იმაზე თავნება მმართველობითი სივრცე, როგორიც დღეს საეკლესიო მმართველობაა, რაც სამწუხაროდ ჩვენს ეკლესიას უკარგავს იმ მთავარ ფუნქციას, სადაც ეკლესია ქრისტეს განსხეულებაა, რომელიც კრიბავს ნებისმიერს, ვინც საკუთარ უფალს ქრისტეში ხედავს“, – წერს არჩილ გამზარდია სოციალურ ქსელში.
