კონკრეტული პარტიების მხრიდან, ცალკეულ კანონებთან მიმართებაში პოლიტიკური პოზიციების დაფიქსირების მნიშვნელობასა და ღირებულებით თანხვედრაზე სოციალურ ქსელში გამოქვეყნებულ პოსტში საუბრობს ინტერნეტგამოცემა “ტაბულას” დამფუძნებელი და მთავარი რედაქტორი. თამარ ჩერგოლეიშვილი ეხმიანება მამუკა ხაზარაძის ერთ-ერთ კომენტარს, როცა “ლელოს” ლიდერმა განაცხადა, რომ საქართველოში უმცირესობის უფლებები კარგად არის დაცული:
“როცა პარტიაში შედიხარ, ჯობია წინასწარ გაარკვიო და შეთანხმდე ლიდერებთან ღირებულებით წითელ ხაზებზე – რომ მერე ტელეფონს თამამად უპასუხო, როცა კომენტარზე რეკავენ.
მამუკა ხაზარაძის დამოკიდებულება როგორც ეკლესიის, ისე უმცირესობების მიმართ არის ნათელი იმთავიდან.
ისიც ვიცი, რომ იმავე პარტიაში განსხვავებული ღირებულებების ხალხიცაა.
ვფიქრობ საკითხი, რასაც მამუკა ხაზარაძე შეეხო იმდენად ფუნდამენტურია, რომ პარტიის სხვა წევრები ერთმანეთს უნდა ასწრებდნენ საკუთარი აზრის გამოთქმას.
წინასწარ გვინდა ვიცოდეთ, დაეხმარება თუ არა ლელო უმცირესობებს კანონის წინაშე თანასწორობის უზრუნველყოფაში – მაგალითად, გამოხატვის უფლებით თანაბრად სარგებლობაში.
დარეკვაც არ უნდა გვჭირდებოდეს.
(აქვე აღვნიშნავ, რომ მამუკა ხაზარაძე სამწუხაროდ წესია და არა გამონაკლისი – გამონაკლისი ევროპული საქართველო, გირჩი და რესპუბლიკელების ბოლო შემადგენლობაა. ასე რომ სააკაშვილის მომხრეები სანამ ხაზარაძეს გააკრიტიკებთ, სააკაშვილის განცხადებებსაც გადახედეთ და მასზეც გვითხარით ორი სიტყვა – თქვენივე დამაჯერებლობისთვის)” – წერს ფეისბუქის პირად გვერდზე თამარ ჩერგოლეიშვილი.
