თეთრიწყაროს მუნიციპალიტეტში მკაცრი შეზღუდვები, რომელიც ეპიდემიის გამო იყო გამოწვეული მოიხსნა. ასევე უკვე ყველა საკონტროლი გამშვები პუნქტი გაუქმებულია და 39 დღიანი შეზღუდვების შემდეგ, მოქალაქეებს თავისუფალი გადაადგილების შესაძლებლობა ექნებათ.
“ბოლო პერიოდის განმავლობაში დიდი სირთულეების დაძლევა მოგვიწია, მინდა მადლობა გადავუხადო ყველა ამ პროცესებში ჩართულ პირებსა თუ უწყებებს, განსაკუთრებული მადლობა მინდა გადავუხადო თავდაცვის ძალებს, პოლიციას, ჯანდაცვის სექტორის წარმომადგენლებს, თეთრიწყაროს ჯანდაცვის ცენტრს გაწეული დაუღალავი შრომისთვის”, – განაცხადა თეთრიწყაროს მუნიციპალიტეტის მერმა გიორგი ქორიძემ.
დღეს პრემიერ-მინისტრმა გიორგი გახარიამ საკოორდინაციო საბჭოს სხდომაზე გადაწყვეტილება გამოაცხადა თეთრიწყაროს მუნიციპალიტეტში მკაცრი საკარანტინო ზომების გაუქმებასთან დაკავშირებით, რადგან როგორც პრემიერმა აღნიშნა, მუნიციპალიტეტში 22 მაისის შემდეგ კოვიდ19 აღარ დაფიქსირებულა.
თეთრიწყაროში კოვიდ ინფიცირების პირველი შემთხვევა 25 აპრილს დაფიქსირდა, ხოლო 26 აპრილს უწყებათაშორისი საკოორდინაციო საბჭოს გადაწყვეტილებით ჩაიკეტა მუნიციპალური ცენტრი.
თეთრიწყაროს მუნიციპალიტეტში სულ კორონავირუსის 55 დადასტურებული შემთხვევა გამოვლინდა, მათგან 50 უკვე გამოჯანმრთელდა. ამ დროისთვის თვითიზოლაციაში 7 ადამიანი იმყოფება, კარანტინში 36 მოქალაქე, სტაციონარში მკურნალობს 5 პაციენტი, თერმოსკრინინგის პროცედურა ჩატარებული აქვს 17 886 პირს, პისიარ ტექნოლოგიით ტესტირება ჩატრებული აქვს ჯამში 872 პირს.
ავტორი
თამთა ასლანიშვილი