საქართველოს პრემიერ-მინისტრმა დღეს გამართულ ბრიფინგზე განაცხადა, რომ თეთრიწყაროში დაწესებული მკაცრი შეზღუდვები მოიხსნება. გიორგი გახარიამ აღნიშნა, რომ მუნიციპალიტეტში 449 ტესტზე მეტი ჩატარდა და 22 მაისიდან დღემდე აღარ დაფიქსირებულა კოვიდ19-ის ახალი შემთხვევა, პრემიერმა ასევე რაიონში მცხოვრებლებს სიფრთხილისკენ მოუწოდა:
„მოგეხსენებათ, რომ თეთრიწყაროს რაიონში დაწესებულია საკმაოდ მძიმე შეზღუდვები. ინფიცირების ბოლო შემთხვევა ჩვენ გვქონდა 22 მაისს, 22 მაისიდან დღემდე ერთი ინკუბაციის პერიოდი უკვე გავლილია და მიუხედავად იმისა, რომ თეთრიწყაროს რაიონში ინტენსიურად ტარდებოდა ტესტირება ბოლო14 დღის განმავლობაში, რაც ნიშნავს 1 ინკუბაციის პერიოდში არც ერთი ახალი შემთხვევა არ გამოვლენილა.
ამ პერიოდში, აქ ჩატარდა 449-ზე მეტი ტესტირება და ინფიცირების არც ერთი შემთხვევა არ გვაქვს, ამიტომ ჩვენ ვფიქრობთ, რომ უკვე შეგვიძლია გადავდგათ ნაბიჯი თეთრიწყაროს რაიონის გახსნის მიმართულებით.
ამავე დროს, უნდა მოვუწოდოთ თეთრიწყაროელებს, რომ დავიცვათ მაქსიმალური სიფრთხილე და, რა თქმა უნდა, ერთმანეთი, ვიყოთ ძალიან ფხიზლად, ფრთხილად, რათა არ მოგვიწიოს კიდევ მსგავსი მძიმე შეზღუდვების მიღება,“ – აღნიშნა მთავრობის მეთაურმა.
