ეთნიკური შუღლის გაღვივების საქმეზე სახელმწიფო უსაფრთხოების სამსახურში მოწმის სახით დაბარებულია დავით ქაცარავა. ანტისაოკუპაციო მოძრაობის „ძალა ერთობაშიას“ დამფუძნებელი აღნიშნავს, რომ ხელისუფლება მის წინააღმდეგ ახორციელებს დევნას, ხოლო დავით გარეჯის თემა არის ახალი შეთხზული და მისი დაბარება დაკითხვაზე, ამ საკითხთან დაკავშირებით, სრული აბსურდია:
„იმ ფონზე, როდესაც ხელისუფლება აწარმოებს დევნას ჩემ წინააღმდეგ და ის საქმე, რომელიც წარმოებაში არის, თეთრი ძაფებითაა შეკერილი, სადაც ოთხი ადამიანი თავს დამესხა და იქ ბრალდებულად მე აღმოვჩნდი, ბრალდებულთა სკამზე, ის საქმე მართლაც სასაცილოა და იქ ძალიან უჭირს ხელისუფლებას, რომ როგორღაც მებრძოლოს.
ამიტომ, მე ვფიქრობ, რომ ეს თემა, გარეჯის თემა არის ახალი შეთხზული. ჩემი დაბარება სუს-ში და ეთნიკური შუღლის გაღვივებასთან ჩემი გაიგივება სრული აბსურდია და მორიგი მცდელობა, რომ ახალი, თეთრი ძაფებით შეკერილი საქმე დაიწყოს ხელისუფლებამ ჩემ წინააღდეგ,” – აღნიშნავს დავით ქაცარავა.
სახელმწიფო უსაფრთხოების სამსახურმა 30 მაისს გაავრცელა განცხადება, სადაც ნათქვამია რომ საქართველოში არსებობენ პირთა ჯგუფები და რიგი მოქალაქეებისა, რომლებიც ცდილობენ ქვემო ქართლის და კახეთის რეგიონში ეთნიკურ ქართველებსა და აზერბაიჯანელებს შორის შუღლის გაღვივებას. გამოძიება დაწყებულია რასობრივი დისკრიმინაციის ფაქტზე.
დავით ქაცარავამ, ამ საკითხთან დაკავშირებით, კომენტრი ფეისბუქის პირად გვერდზეც გააკეთა:
“ჩემი სასამართლო პროცესი ტექნიკური ხარვეზის გამო გადაიდო 22 ივნისს.
ამჯერად უკვე სუს-ში წასვლის დროა.
როგორც იკვეთება, ეთნიკური შუღლის გაღვივების საქმესთან დაკავშირებით დამკითხავენ.
2 დღის წინ სუს-მა გააკეთა განცხადება, რომ იწყებს გამოძიებას ამ საკითხთან დაკავშირებით და ერთ – ერთ პირველ შუღლის გამღვივებლად დაკითხვაზე მე მიბარებენ.
იმ სამარცხვინო, თეთრი ძაფებით შეკერილი საქმის ფონზე, რომელსაც ვერანაირად მართებულად ვერ წარმოაჩენენ, გადაწყვიტეს ახალი საქმე “შემიკერონ”.
მოკლედ, იმედია ვცდები, მაგრამ სინამდვილეში იმის დიდი იმედი რომ ვცდები, მაინც არ მაქვს
ძალა ერთობაშია!.
ბრძოლას ყოველთვის აქვს აზრი!” – წერს დავით ქაცარავა.
ავტორი
თამთა ასლანიშვილი
