საქართველოს პარლამენტში მუშავდება კანონპროექტი, რომლის მიხედვითაც შესაძლოა პირპადის ტარების წესის დარღვევაზე სანქციები განისაზღვროს, იურიდიულ საკითხთა კომიტეტის თავმჯდომარე ანრი ოხანაშვილი განმარტავს, რომ თუ იქნება დარღვევა სახელმწიფომ უნდა მოახდინოს რეაგირება, თუმცა სანქცია უნდა იყოს რაციონალური და არ დააწვეს მძიმე ტვირთად მოსახლეობას:
„ამ საკითხთან დაკავშირებით, ჩვენ ინტენსიურად ვმართავთ კონსულტაციებს, ვამუშავებთ პროექტს, პირბადები არის სავალდებულო, თუ პირბადის ტარების წესს დაარღვევენ, რა თქმა უნდა ამისათვის უნდა იყოს გათვალისწინებული შესაბამისი ადმინისტრაციული პასუხისმგებლობა. სანქცია უნდა იყოს რაციონალური და არ უნდა იყოს ისეთი, რომ მძიმე ტვირთად დააწვეს საზოგადოებას.
ჩვენი მთავარი ამოცანაა, რომ პასუხისმგებლობის მაღალი გრძნობით მივუდგეთ ამ საკითხს. ის კამპანია, რომელიც ცნობიერებისათვის არის საჭირო, რომ ეს ვირუსი არსებობს, არ გამქრალა და შეიძლება შემდგომი აფეთქების რისკებიც იყოს.
ამიტომ, ჩვენ, თუ ასე მივუდგებით და ჩვენი ყველას მიზანი იქნება, რომ ერთმანეთის ჯანმრთელობა და სიცოცხლე დავიცვათ, მე მგონია, რომ საქნციაზე მეტი არის პასუხისმგებლობა, რომელიც თითოეულ ჩვენგანს გაგვაჩნია.
ამიტომ იმედი გვაქვს, რომ მეტი პასუხისმგებლობით მივუდგებით ამ საკითხს, თუმცა იქნება შემთხვევები, სადაც საჭირო იქნება სახელმწიფოს მხრიდან რეაგირება,“ – აცხადებს ანრი ოხანაშვილი.
ავტორი
თამთა ასლანიშვილი
